Mayanê Şeme hewteyo 341. ancîya (onca) meydanê Galatasarayî yê Îstanbulî de çalakîya roniştişî kerd û bêveng vîndîbîyayeyê xo yad kerdî. No hewte bitaybetî Cemîl Kîrbayîr ame yad kerdene ke 31 serrî raver hetê dewleta Tirkîya ra ameybî vîndî kerdene.

Cemîl Kîrbayîr derba 12. êlule ra dime Qers de hetê polîsan ra ame vîndî kerdene û 8. oktobra a serre de îşkence ra merd. Leşa xo kî nêame dîyene. Mayanê Şeme ard zon (ziwan) ke 31 serrî yo ke cayê meyîtê Kîrbayîrî nêameyo eşkera kerdene.

Naye ra kî dot ame vatene ke 11. oktobre 1993 de Dîyarbekir Pasûr de binê qumandarîya general Yavuz Erturkî de 11 dewijî amey vîndî kerdene. Mehmet Salîh Akdenîz, Celîl Aydogdu, Mehmet Şah Atala, Nusrettîn Yerlîkaya, Turan Demîr, Behçet Tutuş, Bahrî Şîmşek, Şerîf Avar, Hasan Avar, Umît Taş û Abdo Yamuk hetê eskeranê dewleta tirke ra ameybî kiştene. Meyîtê nê 11 kurdan o taw amey eştêne cayê. 11 serran ra tepîya esteyê meyîtan amey dîyene.

Parlamentoyê Tirkîya qebul kerd ke ê hetê eskeran ra amey kiştene, labelê hewt serrî yo ke dadgehî ro nê serebûtan nêcêray. Mayanê Şeme da zanayene ke qebulkerdişê vîndîbîyayîşî bes nîyo, gerek ê kesanê ke bi des hezaran cêncî day vîndî kerdene, cezaya xo bivînê.