Mabênê Sûrîye û Tirkîya game bi game beno xirabin. Badê ke dewleta Tirkîya bêçikê xo nay mesela zereyî ya Sûrîye ro, Sûrîye kî bîya fekefisine. Xebera rojnameyê Kanada Free Pressî ra gore pêserameyîşê serekkomarê Sûrîye Esad û wezîrê karanê teberî yê Tirkîya Davutogluyî de serekkomarî wezîrî ra nîya vato: “Dewrê osmanîyan êndî qedîya. Ez reyna hukmê osmanîyan qebul nêkena.”

Rojnameyê Free Pressî no melumat rêxistinêda îstîhbaratî ra girewto. Na xebere ra gore vatişê Esadî ra dime têkilîya Sûrîye û hukmatê Tirkîya birîya ra. No hamnan serekwezîrê Tirkîya Erdoganî tayî emrî daybî, badêna kî wezîrê xo yê karanê teberî rusnaybî Sûrîye. Tirkîya na game ra waştîbî ke juna (yewna) şanş bido Sûrîye. Davutogluyî no atmosfer de bi teyara reşt Şam û waşt ke mektuba serekkomar Abdullah Gulî bido Esadî. Şeş saetî kombîyayîş ra tepîya Beşar Esadî bi qisaya xo têkilîya Tirkîya û Sûrîye kerde zore û va ke nasnameyê Sûrîye ereb o, nêbeno ke nasnameyêde osmanî qebul bo. Melumatan ra gore Esadî da zanayene ke Anqara reyna xo dinyaya ereban meerzo. Tayê pisporê sîyasetî vanê ke nê vatişê Esadî kenê eşkera ke êndî girêdayîşê Tirkîya de seba Sûrîye manaya stratejîke nêmenda.

Beşar Esad serekkomarê Sûrîye yo. Merdişê Hafîz Esadî ra tepîya cayê ey lajê xo Beşar girewtîbî. Beşar Esadî rew mabênê xo bi cîrana xo Tirkîya kerdîbî rind, waşt ke welatê xo bîyaro nêzdîyê rojawanî. Heto bîn ra kî Sûrîye duştê şarê kurdî de Tirkîya de hemkarîye kerdîbî, tayê kurdî teslîmê dewleta tirke kerd. Emser tayê sunîyanê mîlîtanan waşt ke rejîmê Esadî bi şidet birijnê. No pêrodayîş de bi hezaran sîvîl, leşker û mîlîtanî merdî. Werteyê nê serebûtî de Sûrîye tayê heqê qijkekî day kurdan. Jê (sey) Tirkîya, perwerdeyo resmî bi kurdkî Sûrîye de kî hîna qedexe yo.

CEWAB BIDE

Keremê xo ra şîroveyê xo binuse
Keremê xo ra nameyê xo binuse