Ûrûgûay – Hollanda 2:3
Hollanda bi (ebe) skorê 3:2 raya fînalî xo rê kerde ra. Serkotiş esnaya maçî de hende eşkera nêbî, yeno zanayene ke Hollanda bi xo xo şaş kerdo, otelê xo tena heta 8. temmuze reservazyon kerdîbî. Tew.
Estareyê nê maçî Robben û van Bommel yê ekîbê Bavyera Munîhî bîy. Deqaya 18. kaptanê Hollanda van Bronckhorstî waro mîyanên ra pas girewt. 37,5 metreyan ra golo yewin (juyin) a roje eşt. Çi gol. Wa Ûrûgûay sakîn nêmend. Dîego Forlanî 26,5 metreyan ra şanşê xo ceribna û bi serfirazîye raya kaleyî dîye. Deqaya 41. maç beno 1:1. La bextê Holland a roje tikêne zêde bî. Deqaya 70. de Sneîjderî gude eşt, 2:1. No golo pancin ê Sneîjderî yê nê kupa bî. Hîrê deqayan ra dima kî Robbenî pasê Kuytî qafike ra çarna gol. Ûrûgûayo matmende deqaya 92. ame xo ser û Pereîrayî golo dîyin ê ekîbê xo ard ca. La peynîye de Hollanda reşt fînal.
Heta nika Hollanda tarîxê xo de di reyî fînalê kupayê şampîyonîya dinya de bîya (1978 û 1974).
Almanya – Spanya 0:1
Heta nika Almanya leteyo yewin de her rey gol eştîbî, na fay henî nêbî. Şansê golan zêde çin bîy, 30 deqayanê verênan de Almanya zaf pasîf kay kerd, leteyê xo ra nêşî teber. Uca (uza) de henî futbolbazanê spanyolan ser o vindetî. Spnaya bi ekîb şî ver û pîya ancîya (onca) amey peyser, kayê înan pêt bî û pêro kaykerdoxan heta penîye bi lerze (leze) kay kerd. No hal kayê Almanya kerd têwerte ro. Almanya vera Spanya de besenêkerd ke sey (jê) duştê Arjantînî de kay bikero. Spanya Arjantîn nêbî, estareyê xo ca de nêmendî, pay na her ca ser.
No maço muhîm de Spanya taktîkêde giran ra 1:0 ver de ca da. Deqaya 73. de yew (ju) eştişê kornerî de gude bi qafike ra kerd zereyê kaleyê Almanya. Heta a game Spanya nêşîkîya ke xeylê îmkananê golan biçarno. Kayêde taktîk û bidîsîplîn ra Spanya heta peynîye Almanya binê kontrolê xo ra nêvet û bi biaqilênî, no maç efektîf xo rê girewt. Kayê kontraatakan ê Almanya duştê Arjantîn û Îngilîstanî de rind gureyayêne, na fay vera Spanya qet nêgureya û hewnê Almanya bi trajedî qedîya.
Antronorê Almanya maç ra dime va, “Spanya zaf rind kay kerd, ez vana ke ê yê ke na turnuva cênê. Înan ma rê cayê nêverd ke ma kayê xo bîyarîme werte. Înan gude zaf çîp çarnaye, kaykerdoxê ma qefelnay û no maç heqe kerde. Gerek ke ma no maç ra kî tenêna tecrubeyî bicêrîme. Qusurê ma o yo ke ma tope zaf rew kerde vîndî.”
Futbolbazê na turnuva Davîd Vîlla maç ra tepîya kî va, “Ma zaf rind kay kerd û nika fînal der îme. Ma ewro kayêde rindek vet, beno ke zêde golî bieştêne, hama nîya kî rind o. Ma de 21 estare û hunermendê futbolî estê, no semed ra her kes rind kay keno. Nika ma reya verên vejîyayîme fînal.”
Almanya na turnuva de rind kay kerd. Îngilîstan û Arjantin şampîyonîye ra eştî teber. La Spanya zaf qewetine bîye, no rî ra şansê Almanya kêmî bî. No bazar Spanya vera Hollanda fînalê kupayî de kay kena. Xeylê pisporî Spanya nika ra sey (jê) şampîyona dinya vînenê. Spanya heta nika şampîyona dinya nêbîye, di serran ra ver şampîyonîya Ewropa girewtîbî. Roja şemîye kî Almanya duştê Ûrûgûayî de cayo hîrêyin rê kay kena. (Resim: CLF)
