Şêx Abdurrahman Neqşîbendî veng da terîqatê muslumananê kurdan ke ê partîya Tirkîya AKP ra dûrî vinderê. Neqşîbendî da zanayene ke kamo ke AKP de sempatî vîneno, raya neqşîbendîyan ra nêşono. Va, “AKP seba kurdan merden a, kelepçe yo, qirkerdiş o.”
Şêx Abdurrahman Neqşîbendî veng da ke gerek her kes dest bido partîya BDP ke keda aye seba şarê kurdî zaf a. “Îngilizî hîna tersenê ke kurdan ra juna (yewna) Selahaddîn Eyyubî bivejîyo. Henî aseno ke dewletê girsî hetê kurdan kenê, labelê rastikên ê duştê xoserî û azadîya şarê ma der ê.
Tarîx de şêxan jê (sey) Şêx Saîd, Seyîd Riza, Şêx Abdullahê Nehrî, Şêx Ubeydullah û Şêx Mehmûdê Berzencî hem netewî hem kî hetê îtîqad ra sermîyanîya şarê ma kerde. Nika hukmatê AKP ra ju (yew) kar ameyo kerdene ke hîso dînî yê kurdan bixebitno û ke xo duştê yewîya (juyîya) kurdan de bellî keno. (…) Hedefê AKP parçekerdişê kurdan o.”
Şêx Abdurrahman Neqşîbendî rexneyê serekwezîrê Tayyîp Erdoganî kerd û derheqê nimajê îneyê sîvîlî de kî va ke “Hukmat nimaj ser o ke şaro kurd wazeno zonê (ziwanê) xo de bikero, perreno. Xutbeyê ke îmamê dewlete camîyan de danê, qet eleqeya xo bi îslam çin a. Ê tena îdeolojîya resmî ya dewlete kenê vila. No kamuflajêde înkarkerdox û şovenîst o.” Aye ra kî dot Şêx Neqşîbendî kerd eşkera ke weçînitiş de pîyabîyayîş û yewîya (juyîya) kurdan zaf muhîm o. “Şarê ma êndî nêverdo ke partî û hukmatî hetê dînî ra ey bixapnê. Êyê ke bi nameyê dînî propagandaya sîstemî kenê, wicdanê înan îflas kerdo. AKP seba kurdan gonîrijnayîş, merdene û zordestî ya. Mesela kurdan tena bi sermîyanîya BDP, demokratîk û bi raya aştîye ra yena hel kerdene. Gerek pêro neşqşîbendîyê şarê ma raya raste ra şêrê û dest medê AKP.”
Mezhebê îslamî yê neqşîbendîyan hetê kurdê Silêmanî Mevlana Halîd Bagdadî ra her ca de ame nas kerdene. Ewro neqşîbendîye Tirkîya û Kurdîstan de harmeyêde Halidîye yo. Merkezê nê ocaxî Silêmanî der o û Şêx Abdurrahman Neqşîbendî kî uca (uza) nişeno ro. Şêx Neqşîbendî xeylê wext îqaz kerd ke kurdan bala xo bidê sentezo tirko îslam ser o.
