Mîtîngê weçînitişî yê BDP ê Çewlîg de 60.000 kesan meydanê sûke kerd pirr. No mîtîng Çewlîg de heta nika mîtîngo tewr girs ê weçînitişî bî. Sûka Çewlîgî henî qelebalix bîye ke tayê însanî nêşikîyê bikuyê meydan.

Pêserameyîşê destekdayîşê BDP Çewlîg de bi marşê “Ey Reqib” dest kerd ci û tepîya tayê şehidê kurdî amey yad kerdene. Namzedo xoser Altan Tanî kirmancê ke beşdarê mîtîngî bîy, selam kerd û qiseykerdişê xo de va ke “Şima rê selamkerdiş, 1924 ra tepîya duştê kemalîstan de xovereştiş o. Ma şima ra onur vînenîme, eke şima mebîyêne, ma awa koçikê de xeniqnayêne.” Vatişê serekwezîrê Tirkîya Tayyîp Erdoganî ser o kî va ke “Miletê mino delalî, heqê kam esto ke ke ma rê muslumanîye bimusno? Ma êyê ke Asyaya Mîyanêne ra, Moxolîstan ra amey, ma înan ra 200 serrî raver bîyîme musluman.”

Tanî ra tepîya kî namzedo xoser ê Colemêrgî Selahattîn Demîrtaşî qisey kerd û va ke “Ma pêro pîya soz da Çewlîg ke çewlîgijî do bêrê cayê xo ke înan heq kerd. Nika ez bi rehetîya zerrîya xo şikîna vajî ke AKP tîya (îta) ra vişîyo şîyo. Çewlîg êndî kaleya AKP nîya. (…) Bi qerarê nê şarî no weçînitiş de xoserîya demokratîke êndî bêro viraştene.” Derheqê sîyasetkaranê partîyanê tirkan ra kî Demîrtaşî nîya qisey kerd: “Pêro amey qisey kerd, va ke ‘ma selahîyetdar bikerê ma ke şêrîme Anqara xizmetê şima bikerîme.’ Ma tam eksê ci vanîme: ma selahîyetdarîya Anqara bîyarîme şima.  (…) Ma vanîme ke şaro kurd Kurdîstan de bibo azad.”

Mîtîng bi kilam û govend dewam kerd. Şodir ra dew û qezayanê bînan ra xeylê dewijî amey sûka Çewlîg. Qij ra pîl, pêrune meydan de cayê xo girewt. Texmînanê rojnamegeran ra gore meydan de werteyê 50.000 û 70.000 însanî estbîy. Meydanê sûke henî bîyo pirr ke tayêne besenêkerd ke cikuyê. No pêserameyîşo girsa girs ra tepîya xeylê pisporanê sîyasetî ard zon (ziwan) ke Çewlîg êndî destê AKP ra şî. Hewteyo verên kî namzedo xoser ê Dêrsimî Ferhat Tunçî Mamekîye de pêserameyîşo tewr girs ê nikayîn daybî viraştene.

 

1 ŞÎROVE

CEWAB BIDE

Keremê xo ra şîroveyê xo binuse
Keremê xo ra nameyê xo binuse