Qiseykerdişê namzedê CHP yê Dêrsimî Kamer Gençî ke guya dêrsimijî “tirk lajê tirk” ê, hetê xeylê deyîrbazanê dêrsimijan ra ame rexne kerdene. Deyîrbazanê kirmancan naye ser o va ke: “Ma hunermendî caran înkarkerdişê zon (ziwan), kultur, huner û edebîyatî qebul nêkenîme û na mesele rexne kenîme.”

Qiseykerdişê sîyasetkarê partîya CHP Kamer Genç Dêrsim de raver ra hetê rêxistinanê sîvîlan, komelanê elewîyan û roşnvîran ra, nika kî hetê deyîrbazanê dêrsimijan ra ame protesto kerdene. Deyîrbazî Mamekîye, meydanê Seyîd Rizayî de amey pêser û sloganê “Ma wekîlêde asîmîlasyonkar nêwazenîme” eşt.

Nameyê deyîrbazanê kirmancan de Denîz Derman vilaweke wende: “Qiseykerdişê Kamer Gençî hunerê ma rê heqeretêde zaf girs o. Vatena Gençî parçeyê polîtîkaya asîmîlasyonkar o. Kamer Genç û CHP ra gore, ma xeylê serrî muzîk, sînema, tîyatro û şîîranê xo rê xîyanet kenîme.

Hetta dewleta tirke êndî realîteya kurdan qebul kena, çi heyf o ke ju (yew) wekîlê Dêrsimî hîna sîyasetê asîmîlasyonî ra fek veranêdayo. (…) Ma qebul nêkenîme ke o kes nasnameyê ma binê linganê xo de bipelixno.”

Wendişê vilaweke ra tepîya deyîrbazî pêro pîya kilama “Dayê Dayê” vate.

Hunermendê ke Kamer Gençî rexne kenê, nê yê: Denîz Deman, Kazim Oz, Emîralî Yagan, Alî Îhsan Dogan, Înan Arîn Arslan, Caner Canerîk, Rozerîn Kahraman, Çayan Demîrel, Mikaîl Aslan, Aynur Dogan, Metîn Kahraman, Alî Baran, Hozan Dîyar, Şengul Pak, Erdal Cevîz, Alîşan Onlu, Erdogan Emîr, Ozgur Findik, Cemîl Koçgun, Mehmet Ekîcî, Hozan Comert, Belgîn Cengîz, Pinar Yildiz, ZeleMele, Abîdîn Bîter, Gulê, Ugur Beycan, Laşer Guney, Burhan Gundogan, Erkan Eslek, Ozgun E. Bulut, Ahmet Cemîl.