Teqayîşê bombayan ke vizêr mîtîngê weçînitişî yê Partîya Demokratîk a Şaran (HDP) de ca girewto, ney ser o raporê neweyî estê. Çimeyanê cîya-cîyayan ra gore 4 kesan canê xo dayî, bi seyan kesî bîyê dirbetinî.
Goreyê raporê Kongreya Komelê Demokratîkî (DTK) ra, hûmara merdeyanê teqayîşî bîya 4. Nînan tede Remazan Yildiz esto ke 16serrîya xo de nêweşxane de canê xo kerd teslîm. DTK ra gore hûmara dirbetinan kî reşta 416. Nê kesan ra 12 teneyan herme yan qorê (palê) xo kerdî vîndî. 8 kesî pê makînaya respîrasyonî tedawî cênê. Rewşa 22 kesan krîtîk a. Goreyê DTK ra, melumat esto ke taxa Rezikî de di kesî bi çekan ra bîyê dirbetin. Nê kesan ra yewê Nêweşxaneyê Dîcle de tedawî der o. Hîna hûmara merde û dirbetinan tam bellî nîya, çimeyan ra gore reqem vurîno. Serdozgerîya Dîyarbekirî ra gore tena di kesî kişîyayî û se ra zêde dirbetinî estê.
Çîyêde balkêş o yo ke tedawîya dirbetinan de bîlyayê asinênî leşa înan de ameyî dîyene û ci ra kî ameyî vetene. Warê teqayîşî de kî bîlyayî estê. No musneno ke zereyê bombayan de bîlya û parçeyê asinênî estbîyî ke hîna zaf kesî bibê dirbetinî. Vateyê avûkatan ra gore ke polîsî reyde cigêrayîşê teqayîşî ramenê, bi hezaran bîlyayî zereyê bombayan de bîyê. Melumato nikayin ra gore yew bomba zereyê tenekeyêde çopî de bîye, yewna kî yew peyê erebeya çayroşêk de. Seba ke bombayî cayêde nizm de bîyî, xeylê kesî linganê xo de bîyê dirbetinî. Avûkatan ra gore bombayan de pîya yew telefonê destan û tuba pîknîkî tesbît bîyê. Polîsî ra gore parçeyanê tube ser o rêçê bêçikan estê. Vîdeoyê teqayîşî de kerdoxî hîna nêame dîyene.
Hêrişê Dîyarbekirî Kurdîstan û dinya de protesto bî. Almanya de her şaristano girs de nûmayîşî ameyî viraştene. Kurdîstan de kî şar herikîya kuçeyan. Dêrsim de yew çalakîya roniştişî ameye viraştene.
