Hemserekê Partîya Demokratîk a Şaran (HDP) Selahettîn Demîrtaşî derheqê hêrişê bombayan ê vizêrî de qisey kerd. Demîrtaşî va ke gerek milet sakîn bimano û nêverdo ke binê bandura hêrsî de bimano.

Demîrtaş: aştîye Serfiraz bena

“Tabî, wazenê ke nê raverşîyayîşê ma bivindarnê (…). Çîyo ke ma rê lazim o, aştî ya. Ma do aştîye bîyarîme nê welatî. Na aştîye yena nê welatî û şima do a aştîye peyda bikerê. (…) Şima rehet vindê û îzahatanê partîye ra qeder îtîbarê xo pê vilawekanê bînan mîyarê”, Demîrtaşî va.

“Înan waşt ke bi sey hezaran kesî meydan de xo bipelixnê. Bigêrê, peyê ci de kam ke esto, ma wezenîme ke no vejîyo werte. Ma nêvanîme ‘a kerdo, na kerdo’, labelê eke bellî yo ke no hêrişêk o û hetê kamî ra ame viraştene, no seba Tirkîya raye keno ra. Nêbo ke kerdoxê nê hêrişî meçhûl bimano. Bawer bikerê ke ma raya raşte der îme. Ma seba mucadeleyê merdimîye tîya r’ îme. (…) Bi qerardarîya pête, ma do bi xebata xo dewam bikerîme. Meverdê ke hêrs ser bikewo. Ma kampanya ramenîme. Ma do ser bikewîme, aştîye do ser bikewo. Ez metanetê şima pîroz kena.”

Ney ra raver serekwezîrê Tirkîya Ahmed Davutogluyî derheqê teqayîşî de qisey kerdbî va ke teqayîşî “sabotaj û provokasyon” ê. Çi esto ke Davutogluyî kerdox yan sucdarê teqayîşî bellî nêkerdî. Ney ser o serekkomarê Tirkîya Recep Tayyîp Erdoganî va ke ey ceribna pê telefonî bireso Selahettîn Demîrtaşî, labelê besenêkerd cireso. Erdoganî ra gore kî hedefê hêrişî manîpulasyonê weçînitişê roja 7. hezîran o. Erdoganî ewro kî Erdêxan de qisey kerd reyna va “Mi vizêr şan de telefon ro ci kerd, la telefon nêcêno. Ti çayê telefonî nêcêna? Hende dûrî yê ha. Mi wezîfeya xo ya însanî kerde.”

wa Erdogan ozr biwazo

Demîrtaş ke ewro Îstanbul der o, mîtîngê xo de nê vateyê Erdoganî ser o îzahatêk da: “Beno ke ceribna ke mi rê bireso, la no muhîm nîyo. Uca yew şar esto ke rastê qetlîamî bîyo. Telefonê înan bike û ozr biwaze. (…) Serekkomar mîtîngan ra perreno ma ser. Ne beyanê sereweşîye ne kî ‘berzînê to xeyr bo’ esto. Yew saete mîtîng de qisey kerd, derheqê hêrişî de yew cumle nêvata. (…) Kerem bikero bêro Dîyarbekir. Ma ti serekkomarê 77 mîlyonan nîya? Bê cayê qetlîamî de vîlike rone. Mesele ez nîya, gerek ti şarî ra ozr biwazê. Ti ke mi rê telefon kena ra, ranêkena, se beno ke? Di aşmî yo ke 149 cayan de partîya ma rastê hêrişan bena. Her ca bi çek û bombayan ameyî ra ma ser, la tena yew kes binê nezaretî der o.”

hdp demirtas1Qiseykerdişê xo de Demîrtaşî da zanayene ke polîsê tirkî bi gaz mucadeleyê beşdaranê ke waşt hetkarî bikerê, kerd. “Gama ke mi waşt bivejîyî sehne, di bombayî teqayî. Hetê ra ma ceribnenîme hevalanê xo yê parçebîyayeyan war ra bikirişnîme, bivejîme, heto bîn ra polîs gaz erzeno ma ser, raye birneno awe nano ma ra. Meydan gaz de xeniqnenê. Dirbetinî, êyê ke dirbetinan benê, pitikî, pêro nefes ra birnayî. (…) Şima meşte AKP sindoqan de wedarê ke hêzê îradeyê şarî reyna fehm bikerê.”

Karasu: nîsane ra bi nat 250 hêrişî estbîyê

Partîyanê kurdan kî hêrişê Dîyarbekirî ser o şîrove kerd. Endamê heyetê îdare yê KCK Mustafa Karasuyî va ke peyê teqayîşî de AKP esta. Xebera ke Med Nûçe ser o weşana, tede Karasuyî va ke nê hêrişî parçeyê sîyasetê weçînitişî yê AKP ê. Ney ra ver kî xeylê hêriş û provokasyonî verba HDP estbîyî. Aşma nîsane ra bi nat 250 hêrişê duştê HDP de estbîyê. Karasuyî ra gore gerek AKP hukmat ra bivejîyo, çike AKP duştê kurdan de ceng îlan kerd.

Barzanî û hukmat teqayîşan şermezar kenê

Serekê Herêma Federal a Kurdîstanî Mesûd Barzanî kî teqayîşî şermezar kerdî. Mesajê xo de Barzanî nîya va: “Çi heyf o ke vizêr şaristanê Dîyarbekirî de kombîyayîşê şarî seba kampanyaya weçînitişî de di teqayîşî ameyî meydan ke tede hûmarêk hemwelatîyî bîyê qurban û no serebût bî sebebê guman û tersê înan.” Hêvîya Barzanî ya ke weçînitiş bi aram û hewayêda demokratîke de bivîyaro.

Hukmatê Herêma Federal a Kurdîstanî derheqê hêrişê Dîyarbekirî de vilaweke daye. Keyepelo resmî yê Hukmatî de hêriş sey “tersonik” ame şermezar kerdene. “Ma hêrişo ke verba mîtîngê weçînitişî yê HDP de ame viraştene û ke tede çend hemwelatîyan canê xo dayî, bi desan kesî kî tede bîyê dirbetinî, ma nê hêrişî bi tewirêde ciddî şermezar kenîme.”

1 ŞÎROVE

Comments are closed.