Vîdeo: Eke Kurdîstan dewlete bo

Kanalê YouTubeyî ASNA Productionsî yew vîdeo bi sernuşteyê “Eger Kurdistan dewlet be” (Eke Kurdîstan dewlete bo) weşana. Tede bi reqem û anîmasyon derheqê yew dewleta xoser a Kurdîstanî de melumatî yenê dayene. Vîdeo bi kurmanckî yo, cêrnuşteyê erebkî û tirkî estê.

Sey nimûne, eke Kurdîstan dewlete bibo, vîdeo de yeno vatene ke şarê tamîl û sîndî ra dime, kurdî şaro tewr girso bêdewlet o. Hemwelatîyê Kurdîstanî dorê 40-50 mîlyon der ê, no nufus ra gore Kurdîstan dinya de welato 32. o. Na hûmare Kurdîstan nana sewîyeya welatan sey Polanda û Arjantîn. Aye ra kî dot hîrê mîlyon kurdî Îstanbul de, 2 mîlyon Ewropa de, 1,5 mîlyon Xorasan de, 1 mîlyon Sûrîye de, 300.000 Rûsya û dewletanê Qafqasî de û 200.000 kurdî kî Îsraîl de ciwînê.

Hetê rîverîye ra Kurdîstan 409.650 km² yo. Eke ma na hûmare bi welatanê bînan ê dinya têver ro nîme, Kurdîstan bi dewletanê Almanya û Japonya siraya 58. der o. Sînorê dewleta xoser a Kurdîstanî bi şeş welatan estê: Tirkîya, Sûrîye, Îraq, Îran, Armenîstan û Azerbaycan.

Vîdeo de derheqê cografya de hîna zêde melumatî estê. Mavajîme, rîverîya birran ê Kurdîstanî 160.000 km² ya. Yanî, % 39 yê Kurdîstanî birr o. Koyo tewr girs Koyê Agirî bi 5,137 m yo, gola tewr girse kî Gola Wanî bi 607 km³ ya. Çimeyê binerdî yê petrolî Kurdîstanî de 100 mîlyon varîl ê. No Kurdîstan fîno cayo 8. yê dinya, yanî petrolê Kurdîstanî Lîbyra ra di reyî û Qeter ra çar reyî zêde r’ o. Pêro pîya, % 7,5 yê petrolê dinya Kurdîstan de yeno dîyene.

Seba ke 40 mîlyon kesî kurdkî qisey kenê, mabênê ziwananê dinya de kurdkî yena cayo 26. Na hûmare manena ro nusufê qiseykerdoxanê Ukrayna.