Seba ke destekê xo bi hêzanê pêşmergeyan bimusno, deyîrbaza kurde Helly Luv Festîvala Fîlman a Torontoyî de kincanê pêşmergeyan de vejîyaye sehne.
Helly Luv ke her vejîyayîşê sehne de piştgirîya xo bi pêşmergeyan musnena, Facebook ser o da zanayene ke a sey destek kincê pêşmergeyan da xo ra. “Wexto ke ez ameya festîvale, her kesî mi ra pers kerd ke manaya cil û begê mi çik a. Mi organîzatoranê festîvale rê îzeh kerd ke pêşmergeyî seveknayoxê şarê kurdan ê. Mi ceribna ke eşkera bikerî ke pêşmergeyî seba yew dinyaya azad û aşte pêro danê. Noca ra ez wazena vajî ke selamê mi birayanê min ê pêşmergeyan rê esto. Kotî ke ez bibî, zerrîya mi tim leyê înan der a.”
Festîvale de fîlmê Merdanî yê rejîsor Betîn Qubadî ame musnayene, tede Helly Luv kî rolê kay kena. Helly Luv bi xo kênaya yew pêşmergeyê verênî ya. A kurda verên a ke resmî beşdara Festîvala Fîlman a Torontoyî bîye.
