Weşanxaneyê Zehra ke 2008 ra nat Kullîyatê Rîsaleyê Nurî açarnena lehçehya kirdaskî, nika zî ê kitaban ra panc rîsaleyê qijkekî bi zazakî weşanay:
Rîsaleyê Îxlasî:
No eser Kitabê Rîsaleyanê Nurî Lemayan ra tercumeyê Lemaya Vîstin û Lemaya Vîst û Yewin o. Tadayîşê zazakî yê nê kitabî Serdar Bedirxanî kerdo. Bedirxanî demê redaksîyonê Kovara Vateyî de zî gureyayo. W. K. Merdimîn û Çinoyî no açarnayîş redakte kerd. No eser tena derheqê îxlasî de melumato dînî nêdano, semedê xizmetkerdişê dînî zî telebeyanê Rîsaleyê Nurî rê dustûranê esasîyan nawneno. Semedo ke wendoxan rê asanîye virazîyo, binê her rîpelî de manaya tayê kelîmeyanê erebkîyan û terîmanê dînîyan zî nusîyay.
Rîsaleya Nêweşan:
Na rîsale de Kullîyatê Rîsaleyê Nurî ra kitabê Lemayan ra Lemaya 25. û 2. û kitabê Mektubat ra Mektubo 17. ca gênî. Na rîsale yew raybera muthîş a ke alemê manewî û uxrewî ê nêweşan dana ma fehmkerdiş. Bedirxan Îslamogluyî ke Ferhengê Pirzimanî de qisimê zazakî hedirnayo, tirkî ra na rîsale açarnaya, redaktekerdoxî zî W. K. Merdimîn û Ehmed Kirkan ê.
Vateyê Qijekî:
Kitabo esasin ê Kullîyatê Rîsaleyê Nurî “Vateyî” ke behsê meseleyanê umûmî û bingeyên ê îmanî, sey ispatê estbîyayîşê Homayî, Heşir, Qeder, Mucîzebîyayîşê Quranî keno, no kitabo girs ra heşt hebî Vateyî amey weçînayîş û sey yew kitabo qijkek bi nameyê “Vateyê Qijekî” weşanîyayo. Kirdaskî ra tadayîşê nê kitapçeyî bi muqayesekerdişê orîjînalî hetê Serdar Bedirxanî ra bîyo. Açarnayoxî waşto her yew qalî goreyê tewir bi tewir fekanê zazakî binuso û her mintiqa ra çekuyan bişuxulno. Peynîya kitabî de zî yew vajnameyeko zazakî-tirkî hedirnayo. Redakteyê Vateyê Qijekî hetê W. K. Merdimîn ra bîyo.
Rîsaleya Birarîye:
Serdar Bedirxan ke endamê Grûba Xebate ya Vateyî yo, no eser tirkî ra açarnayo zazakî. Na rîsale Kullîyatê Rîsaleyê Nurî ra tercumeyê Mektubê 22. ê Mektubatî yo. No mektub derheqê cuya sosyale der o û yewbînî de eleqedar hîrê babetan ra pêyeno. Beşa sifteyêne de ehlê îman dawetê biratîye û muhabetî beno, beşa dîyine de bisilmaneyî xirs ra men benî û beşa peyêne de tarîfê zemmî/xîybetî yeno kerdiş. Tadayîşê zazakîya nê eserî de W. K. Merdimîn û Lerzan Jandilî redaktekerdiş de keda giranbûha nawita. Binê her rîpelî de zazakî manaya tayê terîmanê dînîyan û vajeyanê erebkîyan ke ê rîpel de vêrenê, amey nuştiş.
Mucîzeyê Ehmedîye:
Na rîsale hîrê sey ra vêşêr Mûcîzeyan beyan kena. Senî ke Mûcîzeyê Rîsaletê Ehmedîye (e.s.w.) beyan keno, o bi xo zî yew kerametê ê Mûcîzeyî yo. Mehmet Yergînî no eser kirdaskî ra tadayo zazakî. Tede behsê mucîzeyanê peyxamberê îslamî beno, semedo ke mijaranê felsefîyan û babetanê xorînan ra qal nêbeno, wendişê ey wendoxî/e de ganecizîye nêvirazeno, hem semedo ke ziwanê xo zî sivik o, go wendoxê zazakî wendişê ey ra zerrîweş bibo.
Adresa Waştişî:
Zehra Yayıncılık San. ve Tic. Ltd. Şti
Adrese: İskenderpaşa mah. Açıklar sk.No: 1/3 Fatih / Îstanbul
Rotiş: 0 212 549 65 70 – 0 212 549 65 70
Telefon: 0 212 635 47 24 – 0 212 635 47 24
Keyepel: http://www.zehra.com.tr
E-Maîl: zehrayayincilik@yahoo.com
(Serdar Bedirxan / DI)
