33 karkerê madenî Şîlî de rijîyayîşê madenî ra tepîya hîrê hewteyî binhard (binerd) der ê. Karkeran besekerd ke xo bixelisnê odaya asayîşî ke uca (uza) canê xo xelisnay û nika bisebr xelesa xo ser o rojî vîyarenê. Texmînan ra gore karkerî çar aşmeyan ra tepîya yenê xelisnayene.

Karkeran ocaxê madenî de karo giran kerdêne, binê hardî (erdî) ra zerrn û maden vetêne. Rojê hard lerza û herre pêro kanalî girewt ser, karkeran kî xo eşt odaya asayîşî ke 700 metreyî binhard der o û henî xo xelisna.

Înan rê yew (ju) lulî ra werd û çîyê şimitişî yeno rusnayene. Seba ke karê xelisnayîşî hîrê-çar aşmî rameno, ê kî wextê xo de xeylê domîno ya kî kart kay kenê. Merdim (mordem) ke vîdeoyeyê înan dî, vano qey keyfê înan henî xirabinî nîyo. 33 kesî hepiso binhard de hêvîya xo ra nêbenê. Labelê rewşe qet henî rehete nîya. Cayê înan teng, tarî û zaf germ o. Hewa de kî toz esto. Ê nêweşîye û îltîhaban ra ancenê (oncenê). Nika kî karkerî odaya xo terk kerd û vejîyay cayêde bîn ke uca hewa tenêna rind û pak o.

Vîdeo de aseno ke rî û leşa înan henî rut ereq dano. Ê qefilîyaye û mirozin asenê. Hetê ra ceribnenê ke bihuyê, çike nêwazenê ke doman, cinî, may û pîyê xo no vîdeo ser qesawete bikerê. Karkeran ra yew (ju) vano, “Ez wazena ke tornê mi û çêyê (keyeyê) mi rê selam bikerî. Têlewe de vinderê.” 700 metreyî binhard ra karkerêde bîn: “Ma zanenîme ke ma tîya (îta) ra vetene ceseretêde girs o û şima pêro seba naye gureyenê.”

Yewşeme ra tepîya ekîbê xelisnayîşî bi (ebe) karkeran kotîbî kontak. Yew roje ra tepîya yew borîya ke 8 sm hîra ya, ame kinitene. Karkeran na borîye ra werd û şimitişê xo girewt. Wezîrê asayîşî yê Şîlî Jaîme Mañalîchî ra gore xelisîyayişê karkeran 3-4 aşmî cêno.

Teber ra nas û xisimê karkeran vîdeoyê înan ser şa bî, çike bi çimanê xo dî ke xisimê înan weş ê. Nika kî xisiman besekerd yew deqa pê telefon karkeran de qisey bikerê. Yew cinîke hesîran ra va ke “Ez şa bîya ke mêrdeyê mi weş o, huyîno û ma rê nîya xebere rusnaye. Labelê zaf bîyo zeîf û zar.” Karkerê madenî semedê kêmîya awe ra zêde kîloyî kerdî vîndî. 33 merdimî dorê 8-10 kîloyî bîyê zarî. Heto bîn ra ke lazim o ke zar bibê ke çar aşmeyan ra tepîya quya tenge ra bixelisîyê.

Çîyêde muhîm o yo ke psîkolojîya karkeran xirabin mebo. Nika hukmatê Şîlî wazeno ke heta xelisîyayîşê nê karkeran yew lulî ra projektor seba nîyadayîşê televîzyonî birusnê. Naye ra teber kî derman, qelemî, kartê kaye û xebere yenê rusnayene.

CEWAB BIDE

Keremê xo ra şîroveyê xo binuse
Keremê xo ra nameyê xo binuse