Qirkerdişê Dêrsimî ser o dokumanê neweyî vejîyay meydan. Dokumananê arşîva dewleta Tirkîya ra gore serranê 1937 û 1938 de 2011 domanî amey kiştene. Enformasyonê otorîteyêde bêhetî ra gore na hûmara ra zêde domanî amey qir kerdene.

No semed ra Musa Kaçarî ke 1938 de pêro way û birayê xo ameybî kiştene, Tirkîya de ju (yew) dewa kerdîbî ra. Seba ke ey Tirkîya de netîce nêgirewt, nika şîyo Dadgehê Heqanê Merdiman a Ewropa ver. Avûkat Bariş Yildirim vano ke 1937 û 1938 de nuşteyê dewlete ra gore 2011 domanî ke mabênê 0-9 serre de bîyê, amey kiştene.

Musa Kaçar wazeno ke dewleta tirke ey ra ef bicêro, çike way û birayê xo Alî û Gulîstan Kaçar dewa Halvorî de hetê eskeranê Tirkîya ra amey kiştene. No semed ra ey serekkomarê Tirkîya Abdullah Gulî rê mektubê rusnaybî ke hîna bê cewab mende. Dadgehanê Tirkîya kî na mesela şîrove nêkerd.

Serranê 1937 û 1938 de nêzdîye 100.000 kurdî Dêrsim de hetê dewleta tirke ameybî kiştene. Tede xeylê domanî, cênc, cinîk û kokimî kî bîbîy. Xeylê dêrsimijî jenosîdê 1938 ra tepîya kî surgun bîbîy.

CEWAB BIDE

Keremê xo ra şîroveyê xo binuse
Keremê xo ra nameyê xo binuse