Festîvala fîlman a Cannesî de emser fîlmê rejîsorê Olîvîer Assayasî bi (ebe) nameyê “Ilich – The Story of Carlos” (Îlîç – Hîkayeya Carlosî) ke 5,5 saetî rameno, xeylê eleqe dîbî. Fîlm serê heyatê Îlîch Ramîrez Sanchezî de ke naznameyê xo “Carlos” ya ge-gane kî “Çeqel Carlos” bî, ame çarnayene. Assayasî ra gore no fîlm dokumenterê aksîyonî yo, jê (yew) bîyografîya Carlosî nika koto sînemayan.

Yeno musnayene ke pîyê Sanchezî avûkatêde marksîst Amerîkaya başûrî welatê Venezuela de bî û no semed ra hîrê lajanê xo ra nameyanê Wladîmîr, Lenîn û Îlîç nay. Lajo xoyo qijkek, yanî Îlîç Ramîrez Sanchez kî serranê 1970an de semedê çalakîyanê ra xo kotîbî manşetanê rojnameyanê dinya. Wextê xo de “Carlos” namdaran ê dinya ra ju (yew) bîbî, remayo bi Fîlîstîn, teyyare remnaybî, suîkast viraştîbî ûsn. Serra 1975 de bi embazê (alvozê) xo hêrişê konferensêde OPEC kerdîbî. No fîlm de sirf na mesele 1 saete cêna. Carlosî weşîya xo seba îdeolojî û bawerîya xo ramite. Şî Fîlîstîn, welatanê blokê komunîstî yê rojhelatî û dima Vîyana de mend. Serra 1994 ra tepîya şî Sûdan û peynîye de uca (uza) hetê polîsê Fransa ra ame pêgirewtene. Çiqas ke pêroyîya dinya Carlos jê (sey) terorîst hesibneno, tayê cayan de, bitayetî hetê rêxistananê çepgiran ra jê (sey) cengdarê azadîye name beno. Roportajê Carlosî bi (ebe) ju rojnamegerî ke Parîs de virazîyaybî, meşhur o. Vatîbî: “Ez ke nika cênc bibîyêne, seba kurdan bigureyayêne.”

Fîlm nika sînemayan de yeno musnayene. Di versîyonê fîlmî estê, ju (yew) 190 deqa û oyo bîn kî tam 330 deqa yo. Festîvalê Cannes îde versîyono derg ameybî musnayene, sînemayan de zafane versîyono kilm yeno yeno musnayene. Serrol de kaybazo venezualayij Edgar Ramîrez o.

1 ŞÎROVE

  1. No fîlm zof siyay bî qayile mi. Di reye qayit kerd û vazen ke onca serkerî. Soreskerê xirt nîya beno.

CEWAB BIDE

Keremê xo ra şîroveyê xo binuse
Keremê xo ra nameyê xo binuse