Kupayê Dinya yê 2014 bi haybetîye qedîya. Peynîye de ekîbê Almanya bi 1:0 kupa girewt. 

Vîzêr fînalê şampîyonîya dinya ya futbolî de ekîbê Almanya û Arjantîn ameyî têrî. Kayo peyên stadê Nûevo Maracaná de ame kay kerdene  74.738 seyrkerdoxan stad de cayê xo girewt. Çimê xeylê kesan de Almanya favorîya kayî bîye. Futbolbazanê almanan ke xo kay ra ver kerdo germ, înan ra Samî Khedîra (Xedîra) wextê germkerdişî de bî dirbetin û cayê xo futbalbazê cêncî Chrîstoph Kramerî rê verda.

Seba ke Almanya û Arjantîn nêwaşt ke rîzîko bigêrê, maç giran-giran dest kerd ci. Arjantîn sayeyê Messîyî de tayê pozîsyonî dîy, hama şuto peyên besenêkerd ke bierzo. Forvetê Arjantînî Gonzalo Hîguaînî kî besenêkerd ke golê bierzo, yew pasê xeletî yê Krossî de Hîguaîn verê kaleyê almanan de tik û tena mend, hama şutê xo leyê kale ra vêrd ra şî out. Leteyê verênî de pozîsyono peyên kornerê almanan bî, kornerê Krossî de şutê Howedesî kî gina dîrege ro .

Leteyê dîyinî de Arjantîn çip dest kerd ci û desinde pozîsyonî dîy, şutê Messîyî leyê dîrege ra vêrd ra. Hama leteyê dîyinî de kî kesî besenêkerd ke gol bierzero, coka 90. deqayî 0-0 qedîyayê û maç şî dergkerdiş. Leteyo verên ê dergkerdişî de kî seyrkerdoxan gol nêdî. Marîo Gotze ke deqaya 88. de seba Kloseyî kewtbî kay, pê şutê rindekî maç deqaya 113. de kerd 1:0 û Arjantîn eşt şampîyonîye ra.

Nîya ekîbê Almanya 24 serran ra tepîya reya 4. bî şampîyonê dinya.

CEWAB BIDE

Keremê xo ra şîroveyê xo binuse
Keremê xo ra nameyê xo binuse