No zanîno: zêde şeker seba didanan rind nîyo. Heto bîn ra kî zanîno ke şeker tena bîskuvît, pasta û çîkolota der o. Gerek merdim naye rast bikero. Hema-hema her werd de şeker esto. Eke şenik o, problem çin o. La zêdeyê ci zerar dano leşa însanî. Şeker sey alkol û tutin rasterast zerar dano mezgê însanî.
Merdim ke ambalajê werd û şimitan biwano, şeker tena sey şeker nêno nuştene. Herinda şekerî de çîyê sey “sakaroz, glukoz, dekstroz, maltoz, fruktoz, lactoz” ûsn. nusînê. Labelê pêro nê çîyî şeker ê. Aye ra kî dot endustrîyê xida ceribneno ke werdo bêrûn ya kî kêmrûnin vejo. Cayê rûnî de şeker yeno xebitnayene ke tehmê werdî nêxeripîyo.
Tayê nimûneyî: zereyê awa şîrine de 12 hebî şeker estê. 250 ml qişaşit de 22 hebî şeker, yew ananas de 44 hebî şeker estê. Awa sayan de 12%, kola de 11%, kremê çîkolata de 21%, hingimên de 80%, reçel de 70%, çîkolata de 55%, ketçap de 34% û bîskuvît de 27% şeker o.
