Xebera Rûdawî ra gore, fermandarê hêzanê Zerevanî Azîzî Weysî da zanayene ke seba ke pêşmergeyî bivîyarê bi Kurdîstanê Rojawanî, verê gerek partîyê sîyasîyî bêrê werê.
Badê ke Kobanê hetê hêzanê rêxistina terorîste bi nameyê “Dewleta Îslamî” (DÎ) ra ame hêriş kerdene, îdîa bî ke hêzê pêşmergeyan kewtî raya Kurdîstanê Rojawanî. Naye ser o fermandarê Azîz Weysî Rûdaw de da zanayene ke “Pêşmergeyî Kobanê nêşîy. Eke şîy kî, bê destûrê resmî şîy. Seba ke pêşmerge besebikero şêro, gerek selahîyetdarê Herêma Federal a Kurdîstanî û yê Kurdîstanê Rojawanî bêrê werê. Eke PYD qebul kena, ma hezir îme ke şêrîme Rojawan biseveknîme. Ma tena bi sereyê xo naye nêkenîme. (…) Herçiqas ke pêşmerge nika ceng der ê, eke qebul beno, ma hezir îme ke ê parçeyê Kurdîstanî kî biseveknîme.”
