Badê ke parlamentoyê Yunanîstanî paketê tesarufî yê 28 mîlyar Euroyî qebul kerd, Atîna de xeylê kesî meydanê paytextî kerd pirr û qerarê parlamentoyî protesto kerd. Seba ke Yunanîstan ke binê deynan de naleno, Yewîya Ewropa (YE) û Fonê Mîyanneteweyî yê Pereyî (ÎMF) ra destek bicêro, gerek no paketê tesarufî parlamento ra bivîyaro.

Pê no paket gerek hukmatê Yunanîstanî 5 serran de 28 mîlyar Euroyê tesaruf bikero. Serekwezîrê Yunanîstanî Yorgo Papandreuyî raydayîş ra ver va ke “Seba îstîqbalê welat, doman û famîlyaya ma ez wazena ke no program bêro qebul kerdene.”

No qerarê parlamentoyê Yunanîstanî jê (sey) şertê YE û ÎMF raya destekê fînansî kerd ra. Na aşme de Yunanîstan înan ra 12 mîlyarî Euroyî deyn cêno.

No qerar ra tepîya Atîna de pêrodayîşêde girs werteyê rexnekerdoxanê programî û polîsî de vejîya. Karkeran raver ra grevê pêroyî yê 48 saetan viraştîbî. Protestokerdoxan xirxî eştî dikan, otel, qewexane û bankayan. 22 kesî amey pêgirewtene. Pêrodayîş û protestoyî hîna tayê rojî dewam kerd.