Badê ke Silûk ame azad kerdene, hêzê YPG nike pêro danê ke Girê Sipî destê terorîstanê “Dewleta Îslamî” (DÎ) ra raxelisnê. Pêrodayîşî hîna dewam benê.

Goreyê merkezê çapemenî yê YPG ra, çekdarê YPG/YPG yê kantonê Cizîre û Kobanê pîya ceribnenê ke ver bi Girê Sipî (Til Ebyad) şêrê. Girê Sipî sînorê Kurdîstanê Vakurî de mabênê di kantonan der a. Eke bîya azad, kantonê Cizîre û Kobanê axir tam reştî pê.

Abîşew dewê dormeyê Girê Sipî de ameyî azad kerdene. Ewro heta vîyarteyê sînorî yê Tirkîya rê tena 1 km mendo. Melumatan ra gore hêzê YPG vakurê rojhelatî yê şaristanî de kewtî zere û nika taxa Meşhura Jor de danê pêro. Teyarayê koalîsyonî kî mevkîyanê DÎ bomba kenê. Rojhelatê Girê Sipî de, warê dewanê Til Berîq û Xabura de, pêrodayîşî qewimîyayî. Hêzê ke hetê Kobanê ra ameyî, dewê Leklêgo, Bir Zinar, Zinar, Kor Hêsên, Savan, El Begêr, Sifeyan, Kefîfa û Lûetfê azad kerdî.

gire-sipi-xerita

Başûrê Girê Sipî ra 13 km dûrî, YPG raya Reqqe û Girê Sipî birnaya. Xebera ANHA ra gore, dewa Cisêriyê ke raya mabênê “paytextê” DÎ Reqqe û Girê Sipî der a, ewro peroj ameya pak kerdene. Nîya çeteyî êdî nêşikînê biresê Girê Sipî. YPG ra gore operasyonan de heta nika bi desan çeteyî ameyî kiştene. Xeylê malzeme û mermî kî kewtî destê YPG. Hîrê cengdarê YPG kewtî şehîd.

Rîyê pêrodayîşan ra bi hezaran kesî sînorê Kurdîstanê Rojawan û Vakurî de vindetî ke bivîyarê. Vîyarteyê sînorî yê Akcakale hetê dewleta Tirkîya ra cadaye bîyo. Di rojan ra dime Tirkîya sînor kerd ra, la hîna xeylê kesî nêreşt sitara xo.

https://www.youtube.com/watch?v=69q0OqziEpQ