Emser Yewîya Ewropa (YE) şaristanê Brukselî de konferanso çarin ê Dêrsimî da viraştene. No konferans de venga dewleta Tirkîya ame dayene ke rastîya jenosîdê Dêrsimî yê 1937-38 qebul bikero. No konferans her serre yeno viraştene ke qirkerdişê Dêrsimî mîyanneteweyî bêro qebul kerdene. No konferans hetê Grûba Çepgiran a Parlamentoyê Ewropa, Federasyono Demokratîk ê Elewîyan, Cematê Newe ra Viraştişê Dêrsimî û Komela Kurmeşijan ra ame viraştene.
Konferans de serekê Grûba Çepgiran Lothar Bîsky da zanayene ke parlamentoyê Tirkîya jenosîdê Dêrsimî yê 1938 de hîna mesulîyetê xo qebul nêkeno. Bîsky: “Gerek na mesele hel bibo. Bê dîyalog aştîye kî çin a. Ez hêvîdar a ke weçînitişê 12. hezîrane de kurdî, namzedê xoserî, do reyanê xo bikerê di qetî. Ma wazenîme ke Tirkîya bikuyo YE, labelê no tena bi çareserkerdişê meseleya kurdan bi tewirêde demokratîk beno. (…) Gerek dewleta Tirkîta xeletîya xoya vizêrêne qebul bikero.”
Tarîxnase Ayşe Hur kî ard zon (ziwan) ke planê dewlete seba qirkerdişê dêrsimijan serra 1931 de ame viraştene. “Mustefa Kemalî her hetê prosesê terteleyî de ca girewt. Sabîha Gokçen ameye pîroz kerdene û Atatirkî bi xo planê Dêrsimî ser o gureyaybî.”
Avûkato amerîkayij Barry Fîsherî kî vat ke Tirkîya de no herb 90 serran ra dewam beno. “Awa Mizurî verê cû gonine bîye û nika kî aye bi awbendan ra kenê xirabine. Dêrsim temsîlê serewedaritişê kurdan, ê zon (ziwan) û kulturê kurdan o. Çîyo ke Saddamî Îraq de kerdo, Tirkîya kî Dêrsim de dana viraştene. Êndî gerek Ewropa na mesele ser o baldar bo. Gerek êndî dinya çimanê xo mesela kurdan ser o pêro mecino.”
