Awbendê ke teber û tebîatê Dêrsimî kenê xirabin, hetê hunermendanê sînema amey protesto kerdene.  Sînemakarî ke sebebê Festîvala Mîyanneteweyî ya Fîlman a Dêrsimî ra amey Dêrsimî, amey pêser ke duştê viraştişê barajan de protesto bikerê. Hunermendan awbendî jê (sey) “Juna (yewna) verzîyonê 1938” şîrove kerd.

Protestokerdoxî raver ra verê sînemaya Mamekîye de amey pêser û ju (yew) pankartê “Dêrsim de awbendî ney, sînema wazenîme” eşt hewa. Sînemakarî jê (sey) Dervîş Zaîm, Umît Kivanç, Haluk Unal û Şîar Abdî uca (uza) ra bi çila xo dest ra pay ra şîy hetê Gola Çetû.

Hunermendan ra pîya sereka beledîyaya Dêrsimî Edîbe Şahîn û namzedo xoser Ferhat Tunçî kî awbendî protesto kerdî. No marşê protestoyî de sloganê jê (sey) “Awendan rê ney, Mizur xoser herikîno”, “Awbend ney, sînema wazenîme” û “Dêrsim de awben nêwazenîme” amey eştene.

Sireyo ke grûba protestokerdoxan reşt Gola Çetû, rejîsor Umît Kivançî qisey kerd vat: “Tayê însanî estê, qayîtê awe kenê û tena awe vînenê. Tayê kî qayîtê kemerî kenê û tena kemer vînenê. Labelê tayê qayîtê awe kenê û xo bi xo vanê, ma naye ra senî şikînîme awbend bivirazîme û pere bikerîme. Çîyo ke îta (tîya) de beno, felaketê tebîetî yo. Gerek merdim (mordem) daha efektîf ser o bigurîyo ke awbendî mevirazîyê. ”

Ferhat Tunçî kî fikrê xo nîya ard zon (ziwan): “Seba ke viraştişê awbendan bêro vindernayene, ma îta (tîya) bi 20.000 beşdaran çalakî kerd. Dêrsim de her duştê viraştişê awbendan der o, labelê viraştiş hîna dewam keno. (…) No kî juna (yewna) verzîyonê qirkerdişê Dêrsimî yê 1937-38 o.”