Hêrişê artêşa tirk a dewa Roboskî ke tede 36 kurdî bi bombayan ra amey kiştene, xeylê şaristananê Kurdîstan û Tirkîya de ame protesto kerdene. Dîyarbekir, Şirnex û Cîzîre ra dime kî xozatijî vejîyay meydan ke qetlîamê artêşa tirke şermezar bikerê.
Pêserameyîşê protestoyî de şarî sloganê jê (sey) “Şehîdî nêmirenê” û “Pêro pîya duştê faşîzmî de” eştî. No mîtîngê protestoyî hetê partîya BDP, şaredarîya Xozatî û tayê rêxistinananê çepgiran ra ame organîze kerdene.
Qij û pîl, camêrd û cinîyan kiştişê Qilabanî protesto kerd. Naye de ame wendene ke hetê ra serekwezîrê Tirkîya destê xo nano karê zereyî yê Sûrîye ro, la heto bîn ra kî sînor de kurdan kişeno. Dêrsimijan da zanayene ke qirkerdişê dewlete kurdan nêtersneno û kurdî şerefê xo ra gamê peyser nêerzenê. “Ma dêrsimijî no qetlîam nalet kenîme.”
Aye ra kî dot pêro dinya de kiştişê Roboskî ame protesto û şermezar kerdene. Amerîka, Kanada, Rûsya, Danîmarka, Almanya, Fransa û xeylê welatanê bînan de aktîvîteyê protestoyî amey viraştene. Paytextê DYA Waşîngtin de kurdan bombardumanê artêşa tirke protesto kerd. Bi parola, afîşî û alaya Kurdîstanî şaro kurd Waşîngtin de ame têlewe û qurbanê Roboskî yad kerdî.
