Koçer Bîrkar, profesorê matematîkî yê Unîversîteya Cambrîdge (Brîtanya) hîrê hemkaranê xo de pîya xelata Fields ya matematîkî girewte. Na xelate sey xelata Nobelî ya matematîkî yena hesibnayene.
Prof. Dr. Bîrkar bi xo Kurdîstanê Rojhelatî, Merîwan, ra yo û Îngilîstan de ciwîyeno. Badê ke unîversîteya Tehranî ra mezun bîyo, sey bextwaştoxî ame Brîtanya. Dima, bîyo hemwelatîyê Brîtanya û beşê matematîkî ser o gureya, dest bi doktoraya xo kerd. Serra 2010î de Prof. Bîrkarî xelata “Philip Leverhulme”yî seba roşnvîran girewte.
“Na xelate bibo sebebê peşmirîyayîşê 40 mîlyon kurdan”
Merasîmê xelata Fieldsî şaristanê Brezîlya Rîo de Janeîro de ca girewt û her çar serrî cayêna de yeno viraştene. Wexto ke xelate girewte, Prof. Bîrkarî vato ke na xelata “dîyarê 40 mîlyon kurdan” keno ke ê kî pê bipeşmirîyê. Girewtoxê xelat ê bînî Peter Scholze (Almanya), Alessîo Fîgallî (Îtalya) û Akşay Venakteş (Hindîstan) ê. Mewzûyê Prof. Bîrkarî yê xelate “Ispatê Sînordarîya Tewiranê Fanoyî û Parê Programê Modelanê Tewr Hurdîyan” bî.
Xelata Fieldsî seba kesanê ke 40 serrî nîyê û warê matematîkî de serkewtişê bêemsalî ardî meydan, yena dayene. Her merasîm de tewr tay di kesî xelate gênê. Reya verêne xelate 1936 de ameya dayene. Çi heyf o ke xelata Prof. Bîrkarî merasîmî ra nêm saete dime ameye tirtene. Medalyaya zerrnêne zerreyê çanteyê profesorî de bî. Raporanê polîsê Brezîlya ra gore, dizdêde nênas çante tirt û medalya ci ra girewte.
