Werdişo hazir de rîskê qenserî

Ju (yew) cigêrayîşê Ewropa ra gore tayê werdanê haziran de madeyê ke rîskê vejîyayîşê qenserî kenê zêde, amey dîyene.

Mamayê pitikan, nan, qewe û cîpsê kartolan de madeyê kîmyewî estê ke şîkînê qenserê roqila û velke bivirazê. Pisporanê cigêrayîşî ra gore nê werdan de madeyê axûyinî jê (sey) akrîkamîd estê. Akrîlamîd, jê (sey) nimûne, madeyo kîmyewî yo ke zafane vetiş û viraştişê plastîkî de yeno xebitnayene. Ekspertanê weşîye ra gore germkerdişê werdanê hazir ya kî cemidnayeyan de no made vejîno meydan.

Seba fabrîkayê werdişanê haziran produktanê xo bi adirêde zaf germ pojenê, akrîlamîd erzîno ci. Herînayox/e ke no werd tawa ya frîtoz de pojeno, tehluke beno zêde. Merdim (mordem) ke zereyê awe de pojeno, akrîlamîd nêvejîno. No semed ra pêşnîyaz beno ke awe ya kî adirêde kêmî de werd bêro potene. Madeyê akrîlamîdî tena qewe, cîpsê kartolî, bîskuvît ya kî pastayanê tezeyan de ney, cîxara de kî yeno dîyene.

Potişê werdê hazirî de nê çîyî pêşnîyaz benê:

• Potişê genim ya kî kartolan de baldar bê. Şima ke nînan tawa ya kî firine de pojenê, werdiş sîya mebo, tewr zêde zerrn biaso.
• Germîya firine henî zêde mebo. 200 normal de bes o. Zereyê rûnê zeytunan tenê margarîn bikerê ke werd sîya mebo.
• Kartolî gerek teze bê, ser de cayêde sîya mebo. Çê (keye) de kî kartolan cayêde tarî de wedarê ke roşt ra mexeripîyê. Kartolan dolabê cemedî de wemedarê, çike uca (uza) para şekerî her roje bena zêdîye û madeyê akrîlamîd tey peyda beno.
• Xora, şima ke wazenê qayîtê weşîya xo bikerê, cîpsê kartolî û werdo hazir mewerê.