Endamanê Yewîya Wendekaran ê Dêrsimî duştê dersa dînî ya mecburî de û seba perwerdeyê kurdkî protesto kerd. Na roje wendegehî boykot bîy û dersxaneyî tal (tol) mendî.
Cêncê lîseyan bi na game wazenê virênî ro asîmîlasyonê îtîqadê Dêrsimî bicêrê. Hewt lîseyanê Mamekîye de wendekaran dersî boykot kerdî. Wendekaran ra Julîde Ateş qisey kerd va ke wendekarî êndî nêwazenê ê dersê ke eleqeya înan bi îtîqadê dêrsimijan çin a, înan biwanê. Aye ra kî dot wendekarî wazenê perwerde bi zonê (ziwanê) xo yê dayîke bivînê. Ateş boyna va, “Înan sîstemê perwerdeyî hende ard peyser ke hetta wendekara juyine (yewine) bi turban kerde ci. Ma ancîya (onca) vanîme ke êndî dersa dînî ya mecburî nêwazenîme. Naye ra teber kî ma wazenîme ke êndî zonê (ziwanê) xo de biwanîme.”
Tirkîya de domanê elewîyî mecburî dersa dînî ya îslamî wanenê û domanê kurdî mecburî perwerdeyê xo bi tirkî cênê. Serranê peyênan de cêncanê elewîyan û xortanê kurdan duştê nê sîyasetê asîmîlasyonî de protesto kerd.
