Seba ke kaybaza tirk a sînemaya Almanya Sîbel Kekîlî festîvalêda fîlmî ya Tatarîstan de xelate girewte, a hetê muhafezekaranê welatî ra ameye protesto kerdene. Festîvala “Mîmbaro Zerrn ê Fîlmanê Muslumanan” de na rey xelata kategorîya kaybaza tewr rinde şîye Sîbel Kekîlî. Fîlmê “Cîyayîye” ke aye tede kay kerdîbî kî seba xelata “fîlmê tewr rindî” ame weçînitene.

Semedo ke Sîbel Kekîlî karîyerê xo yê sînema ra ver tayê fîlmanê pornografîkan de kay kerdîbî, medyaya konservatîf a Tatarîstanî perraybî festîvale ser. Heto bîn ra kî muftuyê Tatarîstanî Îldus Faîzofî viraştoxê na festîvale, wezîrê kulturî, rê mektubêda rexneyî rusnaybî. Tey nuştîbî ke “Sînemakarê ke silayîya na festîvale girewte, qet eleqeya înan bi tradîsyonê muslumanan çin a. Çayê kes ma serekê dînan ra weçînitiş pers nêkeno? Ma wazenîme ke nameyê festîvale ra çekuya muslumanî bêro vetene.”