Weçinitişê edîtoran: Tewr rindê 2010

Serra 2010 ha nayo vêrde ra, zaf çîyî vurîyay, xeylê serebûtê neweyî qewimîyay û dinya boyna çîp-çîp cêrena… Seba ma kurdan kî serrêda biheyecane bîye, hem hetê sîyasetî ra hem kî hetê kulturî ra. Labelê gerek merdim (mordem) na qarnaşîye de tikêna baldar tey nîyabido û ê însananê ke bi angajman, kerdiş ya kî eseranê xo serra 2010 kerde rind û rindeke, xo vîr ra mekero. Nê kes ê ke bi huner û hêzê xo serra 2010 kerde dewlemende û heyatê ma neqeşnayo. Coka edîtoranê ma ra ju (yew) weçinitişo qijkek ê serra 2010 ma pêşkêşê şima kenîme, çend kategorîyan de êyê tewr rindî yê serra 2010 nîya amey weçinitene. (Red.)

Sîyasetkaro tewr rind ê 2010: Ahmet Turk

Nasnameyê xoyê mutewazî, sîyasetkarîya xoya çîpe û welatperwerîya xoya pake Ahmet Turk sîyasetkaranê kurdanê tewr rindan ra kenê ju (yew). Semedê nê karakterê xo ra Ahmet Turk serra 2010 de rastê hêrişê rastgirê bî, dima sîyasetê xo ame qedexe kerdene. Labelê Turkî xo sîyasetê populîstan ra ke jê hetê Hasîp Kaplan ya kî Sirri Sakîkî ra ame viraştene, sevekna, sîyasetê rojane ra dûrî vindet û raya xo ra dewam şî. Seba naye merdim (mordem) şikîno vajo ke Ahmet Turk sîyasetkarêde mêrxas, la ciddî yo.

Deyîrbazo tewr rind ê 2010: Erdogan Emîr

Erdogan Emîrî bi albuma xo “Sad” serra 2010 de hunerê kirmanckî xeylê berd raver. Albume de dej û xemginîye zelal-zelal resenê goşê goşdaran. Erdogan Emîrî albuma xo rinda rind ard pêser, o kilamanê kirmanckî hem bi melodîyanê neweyan hem bi rîtmêde tradsîyonelî virazeno. Hende hîsdar o ke kam ke goş dano muzîkê xo ser, erja kirmanckî ey rê bena xelate.

Rejîsoro tewr rind ê 2010: Mîraz Bêzar

Rast a, eslê xo de xeylê rejîsorê kurdî çin ê ke serra 2010 xeylê fîlmî viraştî. Labelê fîlmê “Min Dît” yê Mîraz Bêzarî hende ciraameye virazîya ke ma qerar de ke Bêzar rejîsoro kurdo tewr rind ê 2010 bibo. Fîlmê Bêzarî de heyat û lejê kurdan bi tewirêde melodramatîk ney, wa seke raste rast kuçanê Dîyarbekirî ra vejîyayê sehne, henî yenê musnayene. Jêhatîya rejîsorî ya ke hîsê ju (yew) şarî pê karekteranê domanan fîlm de cayê xo cênê. No eser gamêda muhîm a kulturê berzî yê kurdan a.

Şaîro tewr rind ê 2010: W.K. Merdimîn

Şîîranê W.K. Merdimînî de o feraset û zanayîş esto ke nîyadayîşo verên de desinde bellî nêbeno. Herçiqas ke çekuyî rehet fehm benê, mîyanê cumleyan de hîkmetêde xorîn paweno ke zerrîya însanî keno şa. Dîwan û dinya ra xeberdar, dem û dewran rê bêeleqe, labelê zereyê însansîya zonê (ziwanê) ma de eserê W.K. Merdimînî xeznêde erjaye yo.

Kuncnuştoxo tewr rind ê 2010: Îlhamî Sertkaya

Îlhamî Sertkayayî serra 2010 de nêzdîyê 50 nuşteyî bi kirmanckî nuştî. Nuşteyanê xo de her hetê heyatî yeno musnayene, çi mewzûyêde ciddî, mavajîme sîyaset û tarîx ser o bo, çi mesela rojane bo. Wendox bi rehetîye nuşteyanê Sertkayayî fehm keno û keyfê xo bi tewirê nuştişê ey ano. Meqaleyî zelal, xorîn û purheyat ê. Hunerê Îlhamî Sertkayayî yo ke zerrîya xo nuşteyanê xo de keno eşkera û zonêde (ziwanêde) ke verê tehlukeyê merdişî der o, ancîya (onca) keno candar.

Nuştoxo tewr rind ê 2010: Roşan Lezgîn

Herçiqas ke Roşan Lezgînî emser bi xo kitabêde newe nênuşt, ma nuşteyanê xo Înternetî ser o teqîb kenîme û bi keyfweşîye hîkaye ya kî fikranê xo wanenîme. Taybetmendîya nuştoxî ya ke şikîno ju (yew) mewzû ser o dergûdila binuso, labelê keyfê wendoxî nêremneno. Hem meqale û hîkayeyê nuştoxî seba raverşîyayîşê kirmanckî muhîm ê hem kî xebata Lezgînî seba geşkerdişê kirmanckî û viraştişê kirmanckîya moderne gamêda lazim a.