Wendoxê delalî,

xeylê kesî, wendox û nuştoxê hêcayî, ma rê her roje pê e-maîl nuşte û materyalê xo rusnenê. Çi heyf o ke nê nuşteyan ra zafane ziwanê ma kirmanckî de ney, bi tirkî yê. Seba ke DêrsimInfo keyepelêde kirmanckî yo, nê nuşteyî nênê neşr kerdene. No semed ra kî keyepelê ma hetê tayê kes û rêxistinan ra rexne beno. Coka ma bi kilmekîye ancîya wazenîme dayene zanayene ke DêrsimInfo keyepeledê kirmanckî yo. Tirkî û ziwananê bînan tîya de ca nêcênê.

Bi kilmekîye, ma rica kenîme ke pêro nuştox, partî, komelî û her kes nuşteyê xo na saete ra tepîya ma rê bi kirmanckî birusnê. Çitur ke nê embazê ma rojnameyanê erebkî, franskî, almankî ûsn. rê nuşteyanê xo bi tirkî nêrusnenê, DêrsimInfo kî na game ra dime nêwazeno ke nê nuşteyê tirkî ma rê bêrê rusnayene. Keremê ma komelanê dêrsimij û pêro kurdan, partî û nuştoxanê ma ra o yo ke na mesele ser o bivindê û naye ciddî bivînê. Êndî gerek no taw de kurdî, bitaybetî kirmancî, fek tirkînuştiş ra verade û bi hurmet û sereberzîye dest bi nuştişê kirmanckî bikerê. Eleqeyê naye bi sîyaset, bi rastgirî û çepgirî ya kî bi welatperwerîye ra çin o. No vindertişê dewamkerdişê înkarî yo ke binê ci de ziwan û zagonê ma 90 serran ra zêde naleno.

Keremê xo ra dest bidê û kirmanckî binusê. Kirmanckî xo vîr ra mekerê, eslê xo rê racêrê.

Bimanê weşîye de,

Redaksîyonê DêrsimInfoyî

3 ŞÎROVEYÎ

  1. Ez %100 heq dana fikrê redaksîyonî. Gerek sîte de ca nêro dayene tirkî rê. Seba ney kam çi heqê xo esto ke rexne keno? Zaf sîteyê kurdan estî ke tirkî weşanenî, coke ra hewce çinîyo ke dersiminfo kî nuşteyanê tirkî biweşano.

  2. WAXTE QESEYKERDENA TIRKI ENDI VIYERDO. LABELE HONA XEYLE KOMELUNE MA, NUSTOXE MA, PIRE MA TIRKI RA NIVISINE. GIRAN U GIRAN ZONE MA YENORA XO SER. RAYA DERSIMINFO RASTO, KAMKE NEY KRITIK KENO, BIZONE KE MARA NIYO…

  3. Dersiminfo, xizmetêde zaf muhime kena.kirmacki, karê hobî û kayî nîyo.Kirmanckî, bîyene û çinîbîyena ma wo.Dersiminfo coka ke muhim o. Dersiminfo ke Tirkî binusno, qîmetê xo nêmaneno. Eke Tirki binusno ya zî biçarnîyo Tirkî, o waxt dersimînfo, mi qet eleqedar nêkeno.

Comments are closed.