U2 konserê xo yê Îstanbulî de kilamanê xo seba cêncanê ke hetê dewleta tirke ra amey vîndîkerdene, vat. Konser ra raver endamê U2 bi (ebe) cinîya Fehmî Tosunî ke serra 1995 de hetê polîsê tirkan ra ame vîndîkerdene, amey têlewe. Konser de kilama xo ‘Mothers of the Disappeared’ (Mayê Vîndîbîyayeyan) seba Fehmî Tosunî vat.
Konserê grûba îrlandayije U2 50.000 xeyranan ver ame viraştene. U2 no konser de 25 kilamê xo vatî. U2 resimê Fehmî Tosunî kerdîbî qapaxê albuma serra 1997 ser. Kilame ‘Mothers of the Disappeared’ seba yadkerdişê Tosunî beste bîyo.
Qeseyê kilame bi îngilizkî û tercumeyê kirmanckî:
Mothers of the Disappeared
Midnight, our sons and daughters
Were cut down and taken from us
Hear their heartbeat
We hear their heartbeat
In the wind we hear their laughter
In the rain we see their tears
Hear their heartbeat
We hear their heartbeat
Night hangs like a prisoner
Stretched over black and blue
Hear their heartbeat
We hear their heartbeat
In the trees our sons stand naked
Through the walls our daughters cry
See their tears in the rainfall
Tercume:
Mayê Vîndîbîyayeyan
Şewlete, laj û çênayanê ma
amey rijnayene û ma ra girewtene
Pirodayîşê zerrîya înan hesnenîme
Ma pirodayîşê zerrîya înan hesnenîme
Zereyê vayî de ma huya înan hesnenîme
Zereyê şilîye de ma hesîranê înan vînenîme
Pirodayîşê zerrîya înan hesnenîme
Ma pirodayîşê zerrîya înan hesnenîme
Şewe sey hepsîyê dardekerdîye
Sîyala û kewela dergkerdîye
Pirodayîşê zerrîya înan hesnenîme
Ma pirodayîşê zerrîya înan hesnenîme
Dar û birran de lajê ma rutî manenê
Mîyanê dêsan de çênayê ma berbenê
Zereyê şilîye de ma hesîranê înan hesnenîme
Na kilame ra tepîya U2 venga xeyrananê xo da va, “Fehmî Tosunî xo vîr ra mekerê.”
Xanima Fehmî Tosunî konser ra dime va ke aye îman nêkerd ke bi grûba U2 bêro têlewe. “Mi îman nêkerd ke ê bêrê tîya (îta), çike sireyo ke albuma înan 1997 de vejîyaybî, Tirkîya de rojnameyan nuştîbî ke eke U2 bêrom Tirkîya gîtarê înan sereyê (sareyê) înan ser de şiknenîme. Sebebê nuşteyanê nîyanênan ra albuma xo de U2 nameyê mêrdeyê mi eşkera kerdîbî. Labelê nika wezîrê Tirkîya înan qebul keno.”
Tosun Xanime qeseyê xo nîya dewam kerd: “Wexto ke U2 werteyê konserî de nameyê mêrdeyê mi ard ziwan (zon), ez zaf şa bîya. Zilfî Lîvanelî a game de şî serê podyumî û na kilame kerde xirabine. Lîvanelî sey (jê) robot uca (uza) vindet. Fekê xo ra towa (tebayê) nêvejîya, mi nêzana ke Zilfî Lîvanelî merdimêde (mordemêde) nîyanên o. Şar seba yew (ju) merdim ke nas nêkeno, mucadele keno, ey rê wayîr vejîno, no Tirkîya rê yo. (…) Sey robot ame û şî. Ez naye ser zaf qahrîya. Ez U2 rê zaf sipas kena.”
Fehmî Tosun bi cinî û domananê xo serra 1993 de seba ke dewa xo hetê eskeranê tirkan ra ameye veşnayene, Licê ra rema ame Îstanbul. 1995 de hetê polîsanê sîvîlan Tosun ame pêgirewtene û o taw ra tepîya qet kesî o nêdî û kesî kî ci ra çîyê nêhesna. Bîyo vîndî şîyo.
