Roja 20.09.2010 de tarîxê kurdan de reya verêne domananê kurdan mekteb boykot kerd. 90 serran ra tepîya domanê kurdî wazenê ke perwerdeyê xo zonê (ziwanê) xo yê dayîke de biramê.

Boykotê mekteban şaristananê sey (jê) Dîyarbekir, Riha, Colêmerg, Wan, Agirî, Mûş û Îdir de bi xeylê domanan ca girewt. Tayê mekteban de sinifî tal (tol) mendî û tayêna sinifan de kî 10-15 wendekarî amey. Komela TZP-Kurdî no boykot da kerdene, bi (ebe) na game ra ê perwerdeyê domananê kurdan êndî (êdî) bi zonê (ziwanê) xo yê dayîke wazenê. No semed ra qerar ame girewtene ke domanî no hewte mekteban boykot bikerê. No qerar ra tepîya xeylê domanî ya mekteb nêşîy ya kî verê mektebî de amey pêser û derse nêkot (nêkewt).

Amed de 90 % yê wendekaran mekteb nêşîy. Şaristanê Colêmergî de pêro wendegehî ewro tal bîy. Wendekaran derse boykot kerde û çê (keye) ra teber nêvejîyay. Polîsan verê mekteban de nobete girewtêne.

Serekê BDP Demîrtaşî no boykot ser o va ke “Îta (tîya) welatê ma yo, no semed ra heqê şarê ma ya ke zonê (ziwanê) xo de şêro mekteb. Asîmîlekerdena bi mîlyonanê domananê kurdan guna mordemî (merdimî) ya. Ma perwerdeyê bi zonê (ziwanê) kurdkî rê destek danîme. Axir her kes zon (ziwan) û îtîqadê xo bi xo bisevekno, dewlete ra êndî towa (tebayê) omid mekerê. Ma nika domananê xo panc (ponc) rojî mekteban nêrusnenîme. Nê panc rojan de û dima kî domenanê xo de perwerdeyo bi kurdkî yeno dayene.”

Aye ra kî dot Dêrsim de komela sosyalîstanê cêncanê Dêrsimî ju (yew) vilaweke kerde vilaye. Mamekîye, Mazgêrd û Qisle de vilaweke daye wendekaran. Na vilaweke bi kirmanckî bîye û sernuşteyê xo “Xortê Dêrsimî, seba zonê (ziwanê) xo” bî.