“Raporê Turîzmî” yê Akbankî ra gore emser tenêna zêde turîst şîyê Tirkîya, hama no trend ra gore para turîstanê ke ameyeyê xo kêmî yo, kî zêdîyaye. No semed ra hûmara turîstanê bînan bîya kêmî.
No rapor ra gore heta nika serra 2010 de heşt mîlyonî turîst amey Tirkîya. Înan ra Almanya ra 1.250.000 (+ 4,5%), Rûsya ra 678.000 (+ 29%), Îngilîstan ra 584.000 (+ 13%), Îran 739.000 (+ 90%) û Sûrîye ra 298.000 (+ 108%). Welatanê bînan sey Îsraîl, Gurcîstan ya Fransa ra hûmara turîstan bîye kêmî.
Trendo newe ra gore turîstê bi ameyeyo kêmî yenê Tirkîya, ê paketê “All-Inclusive” herînenê û hotel ra nêvejînê. Ê turîstî virênîye de şîyêne Spanya ya kî Yunanîstan, nika şonê Tirkîya, çike Spanya û Yunanîstan serranê peyênan de wazenê turîstanê ke pereyê xo zaf ê, biancê (bioncê) welatê xo. Hetê ra kî Tirkîya nê serran de xeylê reklam seba turîstanê bê ameyeyo berz kerd. Aye ra gore Tirkîya bena welatê turîzmê erjanî. Ekspertê turîzm ra gore para nê trendî turîzmê Tirkîya rê zerar deno. Emser faturayê polîtîkaya turîzmê erjan yew (ju) mîlyar Dollarî yo. Tirkîya emser turîzm ra tewr tay yew mîlyar Dollarî zerar vejena.
Aye ra kî dot (wet) enflasyonê werdê hotelan de beno zêde. Emser hûmara enflasyonî hotelan de 9,2 % bîye. Nînan ra çîyê şimitişî 19%, goşt 24%, şit-tarrûtur-êmiş 13% bîy baha. Ser o kî mesrefê hotelî beno berz, heto bîn ra kî turîstê ke wazenê tatîlê erjan bivirazê, yenê Tirkîya. Ekspertan ra gore no konsept ameyox de beno têwerte ro.
Rîzîkoyo bîn: hewteyo peyên de tayê acentayê raywanîye ke tatîlanê erjanan roşenê, îflas kerd. Di serranê peyênan de tam panc (ponc) fîrmayê turîzmî îflas kerd. No hewte kî operatoreyê turî Gold Trail îflasê xo beyan kerd. No semed ra 10.000 turîstê ke Tirkîya de tatîl kerdêne, besenêkerd ke ancîya (onca) şêrê Îngilîstan. Nê acentayê turîstî teyna (tena) turîstanê kêmameyeyinan ser o konsantre bîyê û Ewropa û Rûsya ra turîstî ardê Tirkîya. Nînan ra panc teneyî îflas kerd. Hewteyo peyên kî fîrmayê tirkî Türk Karya Tur ke Ûkranya ra turîstan ano Tirkîya fîrma cada.
Hetê ra kî turîstê erebî û urisî rîyê turîstanê ewropayijan ra nêwazenê ke şêrê Tirkîya.
No semed ra welatê sey (jê) Fransa, Spanya, Îtalya û Yunanîstan ceribnenê ke turîstanê dewlemendan bi (ebe) acentayanê rind û namdaran biancê welatê xo. Pisporê turîzmî kenê eşkera ke no trend ameyox de do dewam bikero. Turîstê ke ameyeyê xo zêde nîyo, şonê Tirkîya û turîstê dewlemendî şonê Yunanîstan, Spanya.
