Hamnan êndî (êdî) qedîya, teber ra beno serd û tarî. No semed ra kî kincê hamnanî dolabe de cayo peyên cênê. Êndî wextê kincanê payîz û zimistanî ameyo. Wa emser kî trendê moda tikê vurîya.

Emser trendê moda nîya beno:

1. Military chic (Eskerî tîtikin)

Şima ke podyum ser mankenan de mantoyê bi (ebe) nameyê “Bombardier” vînenê, ci ra metexelnê. No manto ra raver ra hetê pîlotanê Royal Air Force (hêzê hewa yê Îngilîstanî) ra ame pay kerdene û nika podyumê moda de zaf ro qayîlê însanan şono. No manto emser bi rengê kakî zaf kûno moda. Markayê sey (jê) Burberry û Just Cavalli emser mantoyê Bombardîerî deştêne.

2. Retro Chic (Retro tîtikin)

Par modaya serra 1980 rexbet dîbî, emser merdim (mordem) tenêna şono tepîya, nika modaya serranê 1950-1960 yena. Xojî bi (be) ê cinîkan bo ke modaya ê serran ra hes kenê. Ê nika besekenê gardoroba maya xo ra nê kincan bivejê û pay bikerê. Xeylê markayê moda sey (jê) Louis Vuitton, Fendi û Prada kûnê no trend dima. Bi no trend cinîkî benê seksî û fevkalade.

3. Casual Chic (Edetî tîtikin)

Trendêde femînên, rehet,  şaristankî û tîtikin emser xeylê eleqe vîneno. Céline, Jean-Paul Gaultier Haute Couture nê aşmeyan de no trendê xo zaf-zaf musnayo.

4. Ethnique Chic (Etnîk Tîtikin)

Ethnique Chic na hamnan bena modaya modayan. Wa nika ra xeylê markayan trendê Ethnique Chic kerd koleksîyonanê xo yê payîz û zimistanî. Sey (jê) misal, qayîtê modelê John Gallianoyî bikerê.

Yanî, eke ma top bikerîme, trendê nê payîz û zimistanî pêro tîtikin, yanî chic ê. Gerek ke naye herînayîş de mêro xo vîr ra kerdene.

Rengê nê payîz û zimistanî

Rengê payîz û zimistanî goreyê fikrê patronanê moda ra emser kakî, pudra, şerap, sûr û rengê çolî yê.