Rojnamayê amerîkanî The Hillî hûmara xo ya newîye de yew analîzê derheqê problemanê neteweperwerîye û problemanê mabênê rêxistenanê Kurdîstanî de weşana. Persê rojnameyî yo ke çayê kurdî hîna yew nîyê, eksê ci de parçe-parçe yê. Yew xulasa.
Nuştoxo kurd ê Rojawanî Kajjo rojnameyê The Hillî de analîzê xo de nuseno ke serkewtişê pêşmerge û YPG dinya de reaksîyonêde girs û pozîtîf peyda kerdo. Hêzê kurdî xeylê cayan de bi qehremanîya xo romantîze benê. No semed ra dinyaya rojawanî de îmajê kurdan demêde kilm de xo vurna û zaf bî rind, çike çekdarê kurdî bêters duştê terorîstan de danê pêro. Ancîya, Kajjo vano, herçiqas ke gerek merdim xoverrodayîşê kurdan bigoyno, rastîya ke kurdî sey hertim parçebîyaye yê, na rastîye hedefê înan ê aştî, demokrasîye û çarenuştişê xo rê qet ardim nêkeno.
HEr reya ke kurdî yewbînan de danê pêro, yew dewlete ci ra fayde vîneno
Boyna, mesela pêrodayîşê werteyê PKK û PDK-Î de nêzdî ra beno babete. Her reya ke rêxistinêda kurde yew parçeya Kurdîstanê Girsî de partîyanê bînan de da pêro, o wext dewletê sey Îraq, Tirkîya û Îranî nê pêrodayîşî kerdî hîna giran û fîştî cêmîyan ro. Mîsal, eke PKK PDK-Î de da pêro, dewleta Tirkîya piştî da PDK û seba naye faydeyêde girs dî.
Meqale de nusîno ke bingeyê nê problemî îdeolojî yan sîyaset nîyo. Problem o yo ke hîna hişmendîya neteweyî ya kurdan a rastikêne çin a. Herinda ci de hîna sîstemê eşîran hêzdar o, coka kurdperwerîye zafê reyan pê çimanê eşîre, partî yan yew serekî yena dîyene. Eke wefayê nîyanênî bêrê wedaritene, kurdî vanê qey ê têkilîya xo ya cematî kerde vîndî. Elît û roşnvîranê sîyasî û komelkî besenêkerd konseptêde neteweperwerî yo rastikên teqwîye bikerê. No yew sebeb o ke partîzanîya kurdan tede menda û êdî tena dormeyê yew serekî de ca gêno. Hetta partîyanê tewr averperweran de serekî estê ke pêro heyatê xo serek manenê. Kajjoyî ra gore na fehmêde xelet ê serekî yo.
Bingeyê problemî hişmendîya xelet a neteweperwerî ya
Wexto ke DAÎŞ hêrişê kurdan kerd, xeylê kesan bawer kerdbî ke grûbê kurdî yê pêro parçeyanê Kurdîstanî do bêrê têlewe ke verba nê tehdîdê wehşî hêzanê xo yew û pêt bikerê – wa tewr tay hemkarîya xo cayî xirt bikerê. Labelê hemkarîya kilmek a ke gama lezgîne de virazîyabîye, na hemkarîye ancîya hende lezgîn vurnaya bîya reqabetê partîyan ke kamî hîna zaf duştê dişmenî de da pêro. Analîz de yeno vatene ke rastîye de vîrê kurdan o sîyasî zaf kilm o. Bi vatena bîne, rîyê cîyayîya xo ra rey-rey wehşetê ke verba kurdan ameyî kerdene, ê xo vîr ra kenê.
Dewamê nuşteyî de rewşa sîyasî ya partîyan beno mewzû. Nusîno ke hîna raybero yewbîyaye yê sîyasetê kurdan çin o û heta ke yew Kurdîstano yewbîyaye çin bo, do nêbibo kî. Şertê cîya-cîyayî ke kurdî tede ciwîyenê, dewlete ra gore vurînê. Coka çîyo ke partîyanê kurdan ra pawîyeno, koordînasyon û deyax o, îtîfaqo mutlaq ney. Hîna muhîm, gerek waştiş û lazimîya neteweyî her peymana partîyanê sîyasîyan ra raver bêrê.
Rojhelato Mîyanên ke vurîno, kurdî tene rolêde girs kay kenê. Beno ke kurdî welatanê ke tede estê, uca besekenê raver şêrê. La ma ke nîyadîme rewşa letebîyaye yê sîyasetê kurdan de, zor o ke merdim bivajo qey Kurdîstanêde yewbîyaye do caran estbo yan eke no fikr bi xo rastîvîn o yan ney.
Eke kurdî letebîyaye manenê, kurdîstanêde yewbîyaye rastîvîn nîyo
Meqale (bi îngilizkî) tîya ra yena wendene.
vallah raşt vano hale ma yaman o.her kes veyvê ho de kes jumîn sılayiye nîkeno bı-bıra.. eeey Kırmancîya beleke! Her kes derde ho de her kes partÎya ho de tık sêwî menda ezo qurban