Kovara namdar a Îngilîstanî The Economist hûmara xoya aktuele de reyna meseleya kurdan ser o nuşt. Meqala xo “Tirkîya û kurdê xoyê îsyankarî: cengo bêpeynîye” de pers beno eke tirkî û kurdî pîya biciwîyê. Her roje hûmara kurdan û tirkan ke cewabê nê persî bi (ebe) “heya” dayêne, bena kêmî. Tirkî kî nika xo ra persenê ke avantajê pîyabîyayîşî çik ê. Problem kî heterojenîya nufusê welatî ya. Sey (jê) nimûne, Îstanbul şaristano ke tede tewr zêde kurdî estê, yo, mintiqayê homojenî kî hema-hema tay ê.
The Economist rewşa meseleya kurdan nîya analîze keno: “Mucadeleyê cîyakerdişî 1984 ra bi nat hetê Partîya Karkeranê Kurdîstanî (PKK) ra ame ramitene. Nê aşmeyan de PKK hêrişê xo zêdenay, bi desan leşkerê tirkî mîyan û teberê başûrê rojhelatî yê kurdan de kiştî. (…) No esna de operasyonê leşkerîye vera PKK de benê çîp, partîya AKP (…) plan keno ke ordîya profesyonele sînorê Tirkîya de rono. Tayê tersenê ke wextê 1990an ke o taw 3000 ra zêde dewê kurdan bi zor ra ameybî talkerdene û bi hezaran kurdî amey pêgirewtene, kiştene ya kî vîndîkerdene, peyser yeno.”
Meqale de yeno nuştene ke sîyaseto nikayin ê AKP eksê projeyê xoyo verên, rakerdişo demokratîk der o. Henî aseno ke serekwezîr Tayyîp Erdogan ceribneno ke hetê ra weçinitiş ra ver nasyonalîstan nêqahirîyo û aye ra PKK de qisey nêkeno û heto bîn ra kî zaneno ke eke PKK de qisey nêkeno û piştîya cengî dano, eslê xo de destek dano muxalefet, bitaybetî ordî.
