Festîvala 10. ya Mizurî de Mamekîye de hetê beledîyaya Dêrsimî ra roja 29.07.2010 de heykelê serekê serewedaritişê Dêrsimî Seyîd Rizayî ame ronayene. Ronayîşê heykelê Seyîd Rizayî bi (ebe) keyf û şayîye ame bimbarekkerdene, tey kî tornê Seyîd Rizayî Zelîha Polat û Rustem Polat bîy. Xeylê kesî pê ronayîşê heykelî qayîl bîy, bi tîlîlî û sloganan hetê ra, hetê ra kî bi hesîranê kokimanê Dêrsimî Seyîd Riza welatê xo de ame yadkerdene. Seba ke her kesî waşt heykel paç bikero, miletî xo eşt têver.

Sereka beledîya Edîbe Şahîn no derheq de verê bi kirmanckî qisey kerd, dima bi tirkî dewam kerd. Va ke: “Ma ewro îta (tîya) şahîdîya rojêda tarîxî kenîme. Seyîd Riza dirbeto ke wîcdanê şarî rê çir kena, yo. (…) Çiqas ke jenosîdê Dêrsimî ser o qisey beno, na mesele hîna nêame têrîkerdene. Ez hêvîdar a ke ronayîşê nê heykelî ê kesan rê ke ewro wazenê meseleya kurdan bi şîdet çareser bikerê, raya cîdîyet û rastfikrîyayîşî bimusno.”

Parlementer Şeraffetîn Halîsî ke vat heykelê Seyîd Rizayî xeyalê her dêrsimijî ano ra ziwan (zon), hurmet era mucadeleyê Seyîd Rizayî musna. Va, “Beno ke ewro ra 73 serran ver serekê serewedaritişê Dêrsimî Seyîd Rizayî na roje texmîn nêkerdo. Labelê eke Seyîd Riza ewro biciwîyayêne, vera nê zulmî de reyna sere wedaritêne. Aye ra xeyalê ma dêrsimijan o bî ke ma no meydan ser o heykelê Seyîd Rizayî bivînîme. Û ma no hewn ard ca. Ez venga înan dana ke her felaket ard miletê ma ser de: êndî no meydan do sey (jê) Meydanê Azadîye bikûyo (bikewo) tarîx.”

Qiseykerdiş ra dima grûba folklore ya Varva û koroyê domanan GKM vejîyê sahne û performansê xo musna. Parlamenter Kamer Genç û walîyê Dêrsimî Mustafa Taşkesenî nêamey ronayîşê heykelî. Kamer Genç bi xo festîvale protesto kerdo.