Serrgêra 32. ya qetlîamê Mereşî ser o şaristanê Swîs Bern de ju (yew) panel ame viraştene. No panel de şahidê qetlîamî serebûtê ê wext ard zon (ziwan).

Federasyono Demokratîk ê Elewîyan (FEDA), Federasyonê Komelanê Kurdan ê Swîsî (Fekar) û xeylê kesî beşdarê panelî bîy. Wekila BDP ya Wanî Fatma Kurtalan, FEDA ra Pîr Riza Yagmur, tarîxnas Mehmet Bayrak û sîyasetkar Mahîr Dîcle salonê Don Camîllo Zîeglerî de jê (sey) qiseykerdoxî kotî ci.

Panel de raver şahidê qetlîamî ke o wext xelisîyaybî, qalê dîyayîşanê xo kerd. Înan ra Zarîfe Sarikiş va ke “Ez o taw 10 serre de bîya. Bextê min o ke ez xelisîya. Uca (uza) qirkerdişê xeyrêînsanî ame viraştene.” Îmam Gulerî qiseykerdişê xo de kerd eşkera ke no qetlîam destanê dewlete ra ame viraştene. “No qetlîam bi destanê dewlete ra ame viraştene, mi naye bi xo dîye. Eskeran va ke qedexe yo ke bivejîyîme teber, labelê faşîştan teber ra ma kiştêne. Eskerî qet pêşkarê înan nêbîyêne. Kiştoxan her ca veşnay, nêwaşt ke ju (yew) kes uca (uza) ra bixelisîyo. Xeylê kesî verê çimanê ma amey kiştene.” Ayse Tiraş nîya qisey kerd: “Birayê mi Alî cande kerd qazanê û henî veşna. Ez her serre no tarîx de bena nêweş. Amey kotî çêyanê (keyeyanê) ma, însanîyet ra vejîyaybîy, çi cinî çi camêrd, her kes kişt, organê înan birnay. Mayê ma ceribnay ke domananê xo înan ra bixelisnê, îna nkî cinîyê diganîyî qilasnay ra, cizikê cinîyan û organê merdiman (mordeman) birnay, cande veşnay.”

Panelîstan ra Mehmet Bayrakî qetlîamê ke Kurdîstan de amey viraştene jê (sey) dîa musna beşdaran. Bayrakî va ke pêro nê qetlîamî hetê dewlete ra amey viraştene. Fatma Kurtalan kî qisey kerd va “Uca (uza) de ma pêro merdîme. Ê rojî ma xo bi kemeran seveknayêne, ewro domanê ma xo kemeran ra seveknenê.” Pîr Riza Yagmurî peynîye de kî elewîyan ser o qisey kerd.

CEWAB BIDE

Keremê xo ra şîroveyê xo binuse
Keremê xo ra nameyê xo binuse