Serewedaritişê şaranê ereban dewam keno. Ben Alî û Mubarek ra tepîya nika kî Sûrîye de dîktatorîya Esadî xo duştê protestoyanê şarî de vînena. Badê ke polîsê dewleta Sûrîye 25 kesî kiştîbî, her ca de mîtîngê protestoyî ameyê viraştene. Mîtîngdarî bi sloganê “Azadîye wazenîme” kotî kuçeyan.

Serebûtê Sûrîye gonin vêrdê ra. Şaristanê Daraa de di rojan ra ver 100 ra zêde însanî ameybîy kiştene. Roja 24.03.2011 de kî Al-Sanamîn (nêzdîyê vakurê Şamî) de 23 sîvîlî amey kiştene. Xeylê protestokerdoxî hetê polîsê Sûrîye ra amey eştene bi zere. Nê di şaristanan ra tepîya reya verêne kî Şam de hemwelatîyê muxalefetî vejîyay teber û qetlîamê polîsî protesto kerd. Uca (uza) de kî werteyê înan û polîsî de pêrodayîşo giran vejîya.

Şar seba heqanê xo protesto keno, bitaybetî heqê azadîya fikran yeno waştene. Ardimkerdoxa serekkomar Esadî, Butaîna Şaban, roja panşemîye (posemîye) soz da ke reformî do bêrê, wa qanûnê parlamentoyî bivurîyo û halê îdarîya çîpe ke serra 1962 ra bi nat esto, biqedîyo. Aye ra kî dot pêgirewtişê despotî mebê. Muxalefet hîna guman keno ke hukmat sozanê xo yê reforman ser o vindero yan ney.

Sûrîye de rejîmê Beşar al-Esadî serra 1963 ra nat dewlete arda xo dest. Aye ra bi nat rejîmê polîs û dewlete bi desto çîp hukmat rameno. Fikrê ke duştê îdeolojî û fikirîyayîşê dewlete der ê, nênê qebul kerdene. Zafê reyî protestoyî û mîtîngî bi şidet yenê vila kerdene, zafêrî tey xeylê merdeyî estê, ci ra qetlaîmê Hama dinya de meşhur bî. Nufusê Sûrîye ra kî 5-10% kurd ê. Kurdan zafêrî bi serran heqanê xo ra bîy.

2 ŞÎROVEYÎ

  1. Suriya, Bahrein, Yemen, Tunus, Misir, Lübnan, Ürdün qe seba Amerika u Ewropa muhim niyo. Hedefe na plan de di welatî este: Lîbya u Iran. Bî Misir u Tunus saxna ame xazir kerdene. Nika na vay girewt peye xo u hesîre Lîbya kene. Ez nezonen Lîbya hona cond heftey, asmî uzwe na hesiru yeno. Lîbya ra tepiya k Iran yeno dizayn kerdene. Deyne Ewropa u Amerika zofo u nika inure pere lazimo. Her ci na taw de dorme kar u pere cerexino. Insaniye, birayene, hastiye na cax de merdo. Kurd k endi ney fam bikere. Her milet seba xoyo. Her milet seba hesawe xo gureyeno u waxte welate nasyonel milli hona niverdo. Bê dewlete qiymete sare Kurdi na dinya de cina.

  2. her ci biyo tewerte. arabi ki axre demokrasi vacene rinda. ama tepiya, axre sebeno kes nezaneno. hayuki yene, mordeme newi, insalah daha zede demokrat bene. yaki fundemantalist islam peyniyede yene sare devletu, bene hukumdar.

Comments are closed.