99% yê sûdanijanê başurî weçinitiş de xoserbîyayîş qebul kerd. Aye ra gore başûrê welatê Afrîka Sûdan nika beno welatêde xoser. Weçinitiş de çar mîlyonî sûdanijan reyê xo day.

Kosova ra tepîya nika kî Sûdanê Başûrî qerarê xo yê xoserîye da. Wecinitişo tarîxî de sûdanijan jê (sey) Kosova de seba xoserîya welatê xo rey da. Nika gerek no referandum nêzdî de hetê parlamento ra bêro qebul kerdene. Dugelê hêzdarî yê dinya kî nîşan da ke ê do dewleta xoser a Sûdanê Başûrî nas bikerê.

Werteyê Sûdanê Vakur û Başûrî de 20 serrî herb estbî û tede di mîlyonî ra zêde însanî amey kiştene. Nika jê (sey) çareserkerdişo peyên parçebîyayîşê welatî ame dîyenen. Qerarê referandumî ra tepîya hîna sînor û tayê detayanê bînan ser o jê (sey) dewlemendîyê binhardî (binerdî) û petrol qerar nêame girewtene.

Pisporanê sîyasetî ra gore ancîya (onca) sînorê kolonîyazîmî ke wextê xo de Afrîka de amey xêz kerdene, nika yenê rast kerdene. Afrîka û Rojhelato Mîyanên de pede-pede welatê neweyî vejînê meydan. Qitaya Afrîka heta 1960 kolonîya hêzanê rojawanî bîye, dima kî binê dîktatoran de nalayêne. Hîna Afrîka qitaya tewr feqir a dinya ya.

Sûdanê Başûrî ke xoser bibo, beno welato tewr newe yê dinya. Tayê ekspertî kî vanê ke welatê jê (sey) Cabînda, Somalya û Casamance serranê ameyoxan de benê xoserî.

1 ŞÎROVE

  1. Herkês rawer sono, her sar xoseriya xo, azadiya xo dima sone sare Kurdî, sîyaseta Kurdî peyser sono. No ajiya xorî u girana. Sar beno azad iye ma hona komara demakratîk, demokratîk Tirkîya, “Özerklik” ra xo u 20 mîlyon xezelnene. Gunea….

    Bravo Sudan, ma sima derime!!! Sudan, Kosovo, Tunus mare musneno ke, jü sar ebe xirtiya xo, ceserata xo jü roze reseno xoseriya xo. Inu mare musnene ke teorira, qiseye thol ra azadiye nibena, tena asîmîlasyon beno….

Comments are closed.