Komîteyê destekkerdişê Wanî ke paytextê Swêdî Stockholm de ame ronayene, bi Heyva Sor a Kurdistanê Stockholm de galayê viraşte.

Her parçeyê Kurdîstanî ra 25 ra zêde hûnermendî Stockholm de amey pêser. Qiseyê rakerdişî de Hanîfî Celeplî ard zon (ziwan) ke bi erdlerzê (hardlerzê) Wanî merdimî (mordemî) dîyo ke dewleta Tirkîya dest nêdana kurdan û ardimê dewletanê bînan kî qebul nêkena. Celeplî va, eke wextê xo de mudaxele bibîyêne, hende însanî nêmerdêne.

Dima, deyîrbazo kurd Ciwan Hacoyî qisey kerd va ke gerek kurdî êndî pîya bibê û jubînî (yewbînan) rê deyax bidê. Sereka dîyin a komîteyî Sevgî Gul da zanayene ke heta nika 1 mîlyon kronî arê bîyê û komîte wazeno ke no pere ra ju (yew) dewe newe ra bivirazê.

Konser de hunermendanê jê (sey) Najmaddîn Xulamî, Naser Rezazî, Pywend Jaf, Roj Kerîm, Eyad Hesîn, Şerzad Nanekelî, Armanj, Mezgîn Mela, Alî Mehadîn û Moştaq kilamê xoyê kurdkî vatî.