Homa kesî nêkero wayîrê dostanê sexte. Homa kesî nêkero wayîrê embiryananê hezar rîyan. No di sey serrî yo serewedaritişê Babanzadeyanê silêmanîyeyijan ra nata kurdî sere wedarenê û her serre wedaritişî ra pey kom bi kom yenê kiştene. Serra 1806 de Babanzadeyan sere wedarit. A roje ra heta na roje Kurdîstan bîyo cayê şeran. Împarator û dewletan nêverda kurdî mafanê xo dest fînê. Nêverdayî çaxê xo ra bibê yew. Hertim apey de verdayî.
Dewletî û desthilatî êdî winî musayî, wexto ke şer bo kurdî leşkerê baş ê. Wexto ke şer nêbo kurdî hemalê baş ê. Kurdan no çarenus qet qebûl nêkerd. Her firset dîyîşî ra pey sere wedart. Kurdan netîce nêgirewt la çin zî nêbî. Saqe zî nêrona. Zeîfîyê kurdan est bî. Her çîyî ra ver wayîrê îdolojîyo hemdem nêbî. Wayîrê rayberanê demê xo nêbî. La seba ke rewşe wina ya heqê kesî çin o kurdan ser o terteleyan bi virazo.
Wexto ke şer bo kurdî leşkerê baş ê. Wexto ke nêbo, hemalê baş ê.
Nika Başûrê Kurdîstanî de statûyêko kurdan esto. No çend serrî yo Rojawanê Kurdîstanî de yew sîstemo şaran yê demokratîk aver keweno. Çi Başûr, çi Rojawanî de bo, zeîfî estê û ganî kurdî nê zeîfîyan bi lezkanî bivîyarnê.
Labelê wexto ke Rojawanê Kurdîstanî de kurdan şaranê bînan ra yew sîstem aver vist, gelek kes naye ver nêrehet bîyî. Hêzanê Sûrîya Demokratîke her ke aver kewenê, tayê roşnvîr û nuştoxî rîyê xo yê rastikinî mojnenê.
Sere de hêzanê teberî wexto ke dî Kobanê nêkeweno, piştî da hêzanê kurdî. Badê cû kurdan sîyaseto winî ramit ke Amerîka û Rûsya nêkerd dişmenê xo. Teslîmê nê hêzan zî nêbî. Minbic û Tebka ame raxelesnayîş. Hêzanê Surîya Demokratîke verê xo da Reqa. Dewletan doçika ra girdêr çeke nêdabî hêzanê kurdî. La nika yeno dîyene çekî bêhesab yenê dayene. Tewr peynî de yew teyaraya Surîya gale ard hêzanê HSD ser. Artêşa Amerîka zî da piro û teyara arde war o.
Êdî her kesî dî ke babete cidî ya. Yanê kurdî û şarê bînî Sûrîye de benê hêz, benê wayîrê sîstemê xo. Êdî her kes hemfikir o û hol zaneno ke kurdî do bibê wayîrê statû. Coka dişmenanê eşkera ra vêşî zereyê dostanê sexteyan visîyayo. Nê sextekarî xo aqilmendê kurdan vînenê û rayîran mojnenê kurdanê Rojawanî. Ganî nê kesê winasî hedê xo bizanê. Kurdî bîyê wayîrê sîyaset û dîplomasî. Saya qehremananê xo her roje destanan nusenê. Coka wa kes sey verê nêzdîyê kurdan nêbo. Kurd êdî leşkerê kesî nîyê. Kesî rê hemaltîye zî nêkenê.
Çira vera dewleta tirke veng nêvejenê?
Ê nuştoxê ke vanê Amerîka heta Surîye de nêmanena û şina. Bin ra kurdan tehdît kenê. Ê nuştoxê ke vanê wa kurdî seba Amerîka şer nêkerê; wexto ke dewleta şima kurdan komkiştene ra vîyarnena çira vengê xo nêkenê? Ê nuştoxî Latîn Amerîka ra heta Afrîka uca ra heta Filîstîn, Çeçenîstan wexto ke neheqîye bena, zirna xo cinenê, şima çira vera dewletê xo ya tirke veng nêvejenê? Ez nînan rind şinasnena, kotî dinya de nêheqî bêro kerdene, nînan benê şorişgêr, la eke Kurdîstan de vera kurdan nêheqî bêro kerdene, nînan benê faşîst û terefgirê dewlete. Her kes şêno Amerîka reyde dîplomasî bikero. No zaf normal zî yeno dîyene. La eke kurdan dîplomasî aver viste, nê şovenîstî hezar pîneyan nanê pa. Nînan gore kurdî nêzanê şer, dîplomasî bikerê û îtîfaqan awan kerê.
Wa êdî bêro zanayene, kurdan vernîya xo akerdo. Kurdî îtîfaqan ronenê. Bibo nêbo, kurdî do bibê wayîrê yew sîstemî. Xora şoreşgêranê rastikine xeylê cayanê dinya ra yenê kurdan het de cayê xo genê û têkoşîn kenê. Nînan ra yew zî Kirmizi Fularli Kiz (Kêneka Bi Fularo Sûr) bî a ke verê di serran mi yew nuqtaya gerîlayan de dîbî. O wext mi fam kerd, ruhê şoreşgêranê kurdan resayo gelek cayan. O ruh şoreşgêranê neweyan yê enternasyonalîstan virazeno û aver fîneno.
Qandê cû şovenîstîya eşkera û yê nimite do vindî bikero. Dewletanê dagîrkeranê Kurdîstanî ya do statûya kurdan qebûl bikerê ya zî do nê têkoşînî de vindî bikerê.
Wext ameyo, kurdî do ser kewê. Serkewtişê kurdan zî do bibo serkewtişê heme şaran.
Wext Ameyo. Kurdî do ser kewê.
