Xebera keyepelê Zazakî.net ra gore Weşanxaneyê Vateyî ra kitabêde newe vejîya pîyase. “Dêrsim – Raywanî û Cografya” kitabê raywanî yo ke seserra 19. de hetê ju (yew) nuştoxê armenî bi (ebe) nameyê Andranîkî ra ame nuştene. Nuştox Andranîk bi îhtîmalêde girs wezîfedarêde dêrê (kîlîsa) armenîyan bîyo û wisarê serra 1888î de ju (yew) hevalê xo ra pîya qesebaya Kyoxve (beno ke Gêxî) ra ver bi Dêrsim kûno raye. Dêrsim de fetelîno û tenê kî uca (uza) maneno. Adranîk derheqê raywanî, cografya û şarê Dêrsimî de, yanî kurdanê Dêrsimî ser o biteferuat nuseno. No kitab bitaybetî têkilîya kurdan û osmanîyan ser o eserêde bêemsal o ke tarîxê seserra des û newine ser o melumatêde erjaye dano wendoxan.
Kitab reya verêne serra 1900 de hetê Juyîya (Yewîya) Weşanxaneyê Armenîya ra Tîflîs de bi nameyê xoyo orjînîal “Dêrsim, Çanaparhordûtyûn Yêv Aşxarhagrûtyûn” neşr bîyo. Serra 2009 de Têmûrê Xelîlî fotokopîya kitabî M. Malmîsanijî ra girewto çarnayo kurmanckî ser, kitab Weşanxaneyê Dengî de binê nameyê “Dêrsim, Rêwîtî û Erdnîgarî” de vejîya. Serra 2010 de kî nuştox û şaîr Roşan Lezgînî kitab seba kirmanckî (zazakî) tercume kerdo û nika Weşanxaneyê Vateyî de kitabê Andranîkî neşr bîyo.
Kunyeya kitabî: Andranîk, Dêrsim – Raywanî û Cografya, Kurmanckî ra Çarnayox: Roşan Lezgîn, Weşanxaneyê Vateyî, Îstanbul, 2010, 160 rîpelî
Adresa waştişî: Vate Yayınları, Katip Mustafa Çelebi Mahallesi, Tel Sok. No: 18 Kat: 3, Beyoğlu – İstanbul, Tel: 0 212 244 94 14, e-post: wesanxaneyevateyi@hotmail.com
Dîyarbekir de: Ekinciler Cad., Nurlar Ap., Kat 3, Ofîs – Dîyarbekir
