Bi rengê kirmanckî, tam şeş kitabanê bînan refê kitaban de cayê xo gûret. Raştî kî tawo ke mi na xebera şeş kitabanê kirmanckî wende, ez bi namêye xo hem zaf bîya şad, hem kî mi na xebere ra hêz û qewete gurete û dest bi nûsnayena nê nûstê xo kerde.
Se ke êno zanitene anê rojanê verî hetê Weşanxaneyê Vateyî ra şeş kitabên kirmanckî weşanayî. Tê rêze de û tê dime weşanayena nê şeş kitaban, şarê ma nê Kirmancî rê ez bawer kena zê yew xizna zerrna amê. Çunke, her yew çekuya ziwanê kirmanckî, her yew herfa ziwanê kirmanckî,… ma re zê xizna zerrna wa. Se ke şima kî zanenê, na xizna kî hênî rehet rehet nêna mîyan, ancax bi emeg, bi kede û bi fedekarîya însanî êna mîyan.
Na keda nuskaranê manê hêcayan ra dime kî, merdimî kî êndî zano kê kirmanckî kî êndî meywe xo giran giran dano, lê na rêye bi rengê edebîyatî meywe xo da. Nê şeş kitabî, ziwanê kirmanckî re zê melemî, ma re kî zê omidî amayî. Çekuyê kirmanckî yê ke wedardayîyê, ê çekuyî nika ripelanê edebîyatî bi reng û vengê xo xemelnenê.
Raştî kî ziwanê edebîyatî, ziwanê de mayxoş û şîrîno. Merdemî maşûqê xo keno. Çiqas ke ame nusnayene honde kî rindekîya xo û rengê xo re merdemî weş êna. Edebîyat, baxçê gulanê ziwanî de zê sura vayî yo. Na sura vayê baxçê gûlan, ke xo şana re çekuyan, çekuyî kî benê rêze û têdime juye bi juye rîşînê bi ripelanê sîpîyan ser.
Ewro na xizna kitabanê kirmanckî hênî mûsnena ma kê, edebîyatê kirmancî amo cayê de zaf muhum. Mi yew nustê xo de derheqê edebîyatê kirmanckî de: Helbet raxelesîyena ziwanê kirmanckî giredayîyê zaf çîyana. Lê mira gore tamara canê ziwanê kirmanckî ra yewe kî edebîyato. Yanê tamara canê ziwanî ya tewr muhume ra yewe kî edebîyato. nîya ardî bî ra zon û nusnay bî.
Raştî kî kam se vano wa vaco lê, ziwanô ke edebîyatê xo ravêr nêşî, raxelesîyena ê ziwanî kî qet bêguman çîn a. Edebîyat, can û roh dano ziwanî. Ziwanî lingan ser cêno. Cire beno per û bask. Eke per û bask re yew ziwanî şîkîya yî, o ziwanî kî ser raştîya xo êndî nêvîneno.
Yanê ziwan û edebîyatî zê nênig û goştîyê, yewmînî ra cuya nêbenê û giredayîyê yewmînîye. Raver şîyena edebîyatî, raver şîyen û raxelesîyena ziwanî ya.
Her çiqas ke kirmanckî serre bi serre gamê raver şono kî, na rêye Weşanxaneyê Vateyî bi emeg û keda nuskaranê kirmancan gamê hewlî êştî û şeş game bînî ziwanê kirmanckî raver berd. Na raver şîyena ziwanê kirmanckî re û na xizmeta nîya hêcaye re kî, qet bê guman merdim kî hêz û qete cêno, kêf û eşq cêno, coş û heyecan cêno,… û zaf kî beno şad.
Na xizmeta hêcayê re kî ganî şarê ma cire wayîr vecîyo, wayîr vecîyo ke na xizmeta hêcaye nîya dewam kerone şorone. Nê kitabî ke nîyamayî guretene û hetê wendoxan ra ke nîyamayî wendene o taw qedr û qimetê keda însanî kî nêmaneno.
Ez kî bi na wesîle nê şeş nuskaranê manê hêcayan: Akman Gedîk, Xidirê Başî, Mehmûd Nêşite, Alî Beytaş, Alî Aydin Çîçek û Sîyamend Mîrvanî re zaf sipas kena û hemî ki înan zerre û can ra fîraz kena.
Wusênê Gestemerde
Berlin, 19.08.2012
Vijdana to ya xere bira Usen,Ez bawera zaf nezide ne kitabi kune ma dest.Ez ki ne nuskaran pero piya Firaz kena u eynare serfiraziye wazen a.Baweriya mi awa ke,wexte de kilm de ne kitabi kune ma dest.
Bira Îbrahîm, wulle çimê ma ray û dirban der o. Ma dest kêwtena nê şeş kitabanê kirmanckî, ez bawerkena giredayê îmkananê wayîrê Weşanxaneyê Vateyî ya. Lê se ke to kî rind zanena, hona problemê ma çi hêyf ke her hete ra rind nîyame çareserkerdene. No sebeb ra kî beno ke nê kitabî taye here ma dest kûne. Ez bi na wesîle wayîra/ê Weşanxaneyê Vateyî ra dexalet kena, ke wa ma re keremê xo ra kitabanê kirmanckî û ferhenganê Tirkî-Kirmanckî biruşnê.
Bira wusen,mi nüste to taye here´ferq kerd,ayera qusire mi de niya mede.Se ke to Ardo bi ziwan,Her çi giredaye imkanane wayire Weşanxaneye Vateyi ya.Heni Asen ke ma gani taye bi sebir vindime.
Na çend rojiyo ez wazen ke bi to de tekiliye ki.Telefone mine desti xerepiya u mi da bi tamir,Nr. xo vera kerd bi u kopiye karti nekerd bi.Tamir ra dime ke mi telefone xuye desti guret,dumano siya mi mecero,Nr.kuli biye vindi şiye.Nika Nr.to mide çino. Bi kereme xo, gelo to şikina Nr.xo mi re burişne. Ez wazen tode ne Rojan de tekiliye ki. Bimane weşiyede.