Serebûtê Dîyarbekirî: Hûmara merdeyan bîya 5

Dîyarbekir de vizêr yew grûba çekdare yewna kes kişt. Nîya di rojan de 5 kesî Dîyarbekir de ameyî kiştene.

heta ewro 5 kesî bi çekan ameyî kiştene

Yew grûba çekdara bi maskeyan vizêr saeta 01:00 de na kortika Fesîh Çinarî ra û o nîya kişt. Çinar hema 33 serrî der bîyo. Hêriş Sûrê Dîyarbekirî de ame kerdene. Çinar amebî berdene nêweşxaneyê Unîversîteyê Pîran, la semedê dirbetê xo ra canê xo teslîm kerd.

Ney ra raver, 9. hezîrane de Bajaro Newe yê Dîyarbekirî de serekê komara ÎHYA-DER Aytaç Baran amebî kiştene. Aytaç Baran endamê partîya Huda-Parî bîyo. Huda-Par partîya muhafezekara dîndar a, harmeyê aye yo eskerî Hîzbullah o. Hêriş ra dime ancîya da-15 kesanê nênasanê bi maskeyan çekê xo nayî banê Komela “Hemwelatîyanê Azadan” û qewexaneyê ucayî ra. Nê hêriş de hîrêna kesî kişîyaybîyî, 4 kesî kî bîbîyî dirbetinî. Ê hîrê kesê ke kişîyayê, endamê HDP bîyê.

KCK: Na kerdena AKP ya

Hîrê HDPijê ke amebîyî kiştene, ewro ameyî wedardene. Walîyîya Dîyarbekirî heta nika 14 kesê ke serebût de gumandar ê, girewtî binê nezaretî de.

Çapemenîya tirke de verê îddîa bîye ke Baran hetê hêzanê nêzdîyê PKK de ameyê kiştene, çike mabênê PKK û Huda-Parî de verê cû kî têkewtişî qewimîyayîbîyî. Çi esto ke hemserekîya KCK îzahatêk weşana, tede yeno vatene ke nê kiştişî karê PKK ney, la kerdena hukmatê Tirkîya ya. “Ganî pêro rayapêroyî û şarê ma bizano ke nê hêrişî semedê hêvî û firsendê weçînitişî ra ameyî kerdene.” Boyna, vilaweke de wina nusîyayo: “Şaro kurd vîyarteyê xo de hêrişê Hîzbulkontra ke binê kontrolê JÎTEMî der ê, dîyê, nê hêrişî kî manenê ro ci. Nê hêrişkarê ke weçînitiş ra ver her firsend de perrayêne welatperweranê ma ra, weçînitiş ra tepîya kî bi hêrişê xo dewam kenê. (…) Ê ke hêrişê şarî bi nameyê Hîzbullahî kenê, JÎTEM o, çeteyê hêzanê xorînan ê. Tevgera Azadî ya kurdan bi aşman nêameya kayê AKP. (…) Nê hêrişê Amedî duştê şarê kurdî de îlanê cengî yê hukmatê AKP ê.”

Demîrtaş: Ê ke qetl benê, ma yîme, ê ke sucdar benê ancîya ma yîme.

Hemserekê HDP Selahettîn Demîrtaşî derheqê serebûtanê Dîyarbekirî de verê çapemenîye de qisey kerd va “Ê ke qetl benê, ma yîme, ê ke sucdar benê ancîya ma yîme.”

Qiseykerdişê xo de Demîrtaşî serebûtê Dîyarbekirî nîya ardî ziwan: “Serekê komela ke nêzdîyê Huda-Par de yeno zanayene, yeno qetl kerdene, rastê suîkastî beno û desinde dima ra kesê ke sey mîlîtanê Hîzbullahî name benê, di hevalanê ma yê HDP cayê serebûtê de qetl kenê. Yewna hevalê ma yo HDPijî zereyê banê xo de, qata 5. de qetl kenê. Kamî çi kerdo, gerek vejîyo meydan. (…) Kamî serekê komela ke nêzdîyê Huda-Parî ya, kişto? Kam beno wa bibo, ganî no bêro eşkera kerdene. Vizêr kamî Dîyarbekir de hîrê HDPijî qetl kerdê? (…) Nê kesê ma sucdar kenê, hukmatî de estê. Ê ke qetl benl, ma yîme, ancîya ê kê hetê hukmatî ra sucdar benê, ma yîme. Eke şima besenêkenê, caverdê. Hukmatî kî caverdê. Şima ke pê nê karî nêşikînê, yew kadro vejîno ke welat îdare bikero.” Peynîye de Demîrtaşî partîyê sîyasîyî baldar kerdî ke sakîn bimanê. HDP kesî de dişmen nîya, rêxistina çekdare kî nîya, Demîrtaşî va.