Ma çi binusnime, çi menusnime!

Bawer bikerê, qal zaf o, babetî zaf ê. La mordem gege nêzaneno ke, kamejî qal, kamejî babete binusno. Heto bîn ra zî, ez gege fikirîna ‘gelo eke ez roj û şewe bibusnî, çiqas wanîno, çiqas yêno fam kerdene?’.

Ez naye zî nêzana.

Ma ez qey nusnena?

Ez zî nêzana. La çîyo ke zanena, ‘ez karê xo kena’.

Seke mi va, babetî henî zaf ê ke…

La çîyo ke bala mi anceno, dişmenîya dişmenî, zalimîya înan, xirabîya înan, yanê ê dewleta Tirkî’ ney, ê yê qaşo ‘verba na xirabîye’ yê, nakokîye û lêlîya înan ê. Eger ke şima înan ra seba ke qey zonê xo nêmisenê, nêzanenê pers bikerê, cuwabê pêruna nîya wo; ‘ma bîme asîmîle’.

Sebebo ke ‘ma bîme asîmîle’ gereke ma endî zonê xo memisime? Mezanime?

Ma ez? Ez zî zê şima ‘asîmîle nêbîya’?

Mekerê, ayb o, şerm o, kay mekerê!

Tewr zêde zî, ez ê kesê ke bi Tirkî vanê ‘ma zonê xo ra wayîr vecîme’, la bi serranê ke qet zonê xo nêzanenê, nêmisê, înan ra hem huna, hem qarîna. Nê ‘kaykerdoxan ra ju’, serran ra tepya, reyêna rastê mi bî. Ancîna a qafike, o aqil, a mêzge, o vate; ‘ma zonê xo ra wayîr vecîme’.  Ez huya. Mi ci ra va;’ma kamî dest û lingê to, zonê to girê do? De zonê xo ra wayîr vecîye.’’! Tayê vinet, dime ra ancîna a cumleya ke endî mordemî bêzar keno, va;’ez bîya asîmîle’. ‘Bira’ mi va, ‘raya xo de şo, ti, xorê ebe xo, kay kena’, endî nê maneyan cavirde, ti ke zonê xo naye ra tepya nêmisena, nêzanena, guna kesî mege, sebeb tîya, xo mexapne’!

Ez neheq a gelê wendoxan?

Wa xwezila ez neheq bîyêne! ‘şima’ zonê xo bimisê, bizanê, qesî bikerê, wa ‘ez neheq bî’.Muhum nîyo.

Bulent Arinc vano çi; ‘Ê yê ke wazenê bi kurdî perwerde bibê, wa şorê ‘bakurê İraqî’ Yanê şorê Kurdistanê Başurî’. Yanê Kurdistanê Bakurî de, ‘nêbeno’. Şima heşênayî? Şima ke heşênayî se kerdî? Ya zî, Bulnet Arinç qey nîya vano? Kamecî mantiq naye Bulnet Arincî ra dano vatene?

‘Şima’! Ez vana ‘şima’, ê fam kenê, ez qalê kamî kena. Coka ke ez vana ‘sebeb tîya’.

Ahmed Turk, seba ke heqê zonê ma bişevekno, vano ‘ju hefte ma mektebê tirkî boykot kenîme’. Gelo na mesela ‘ju hefte boykot kerdene wa’? De boykot bikerê ju hefte. Ju hefte ke qedîya ma? Yanê reyêna, ‘dewamê mektebê Tirkan bikime’. Hesasîyetê zonî ke no merhale de bo, Bulent Arincê şarî qey ebe ma leqe mekerê? Ma kêy fam kenîme ke, zon, ‘bîyene û çînî bîyena ju miletî yo’? Ma kêy fam kenîme ke, ju millet, heqê zonê xo ser o, qet nêkeno babeta munaqaşayî.

Wi Homa, Heqo, Xizir, ti sebir bidê ma! Sebir bidê ma, aqil zî bidê mutacan. Aqil bîdê ke wa bizanê ebe ‘yaşasin û kahrolsinê Tirkî, ne kamîya ma, ne zonê ma, ne zî serbestîya ma peyda nêbeno.

Dinyaya ke ma tede yîme, halo ke ma tede yîme….

Ma serekê Fîlîstînî va çi? O zî nîya ‘hakan’ kerd; ‘Surîya ke bivurîyo, Kurdî benê wayîrê dewlete. No, teluke yo’! De haydê, ‘bêrê sayan’. Gelo seba serbestîya Fîlistînî, çend xortê Kurdan şehîd bîyî? Kam zaneno?. Gelê ‘enternasyonalîtan’, şima vanê çi?

Ma Aysel Tugluk xanime vana çi? Dewlete ra vana ke ’xem mekerê, Ocalan, ebe çepgîr û demokrasîyê Tirkan ra îtîfak keno, firsend nêdano ‘mîllîyetçîyê’ Kurdan’. Ax ke ma ‘mîllîyetcî’ bibîyêne! Ma ke ‘mîllîyetcî’ bibîyêne, ne dewleta Tirkî ebe ma nîya kay kerdêne, ne zî Aysel xanime na leqe ebe şarê ma nêkerdêne.

Ma nînan bercime kişte.

[divider] [/divider]

Nê heftanê peyênan de, mi bi saya birêz Roşan lezgîn û nusnoxê na kêyepelge, birêz Mahmud Nêşite’yî, nê kitabê hîkayeyan wendî;

HEVÎYA MACİRE-  Buçîn Bor

PÎYÊ Mİ KEMANE ÇÎNİTÊNE-  Nadîre Guntaş Aldatmaz

HEŞÊ MİŞÎ-  Murad Canşad

ZEMAN SEY FEKÊ KARDÎ BÎ-  Şêyda Asmîn

BİNÊ DARA VALÊRE DE- Roşan Lezgîn

BERENGE- Umer farûq  Ersoz

Her çî ra ver, ez nê nusnoxan ra, zaf spas kena. Çîyo ke bala mi anta, nusnoxê xanimî bîyê û benê zêde. Elbet nîrxê mi, nê kitaban ser o estê. Wa nika vindo. Roştîya Wêşanxaneyê Roşna’yî birqîno. Demêde Kilm de, kitabê weşî çap kerdê. Nê wêşanxaneyî ra, serkewtene wazena ez. Zon, edebîyat o, edebîyat, zon o. Ê yê ma ra bi Tirkî leqe kenê, vanê ‘ma wayîrê zonê xo bivecîme’ cuwabê înan nê nusnoxê hêjayî, ebe nusneyê xo, ebe kitabê xo danê. Kay û leqa înan, ebe nusne û kitabanê xo dirnenê, kenê binê linganê xo, kenê paç û pun.

Zonê ma ra mebê sebebê leqan û derdan, bibê derman.

İlhamî Sertkaya

15-9-2013

 

2 ŞÎROVEYÎ

  1. Bira bira ebe cepgirane Tirkan hale Dersimizi werte dero. Ziwan kerd xo virr, itiqqt kerd xo virr, owa Muziri kerd xo virra, jiyare hazar serri kerd xo virr, yani xo kerd xo virr. Ziwane u netewiya sare binide be taybeti iye dismen de cepgirenek nebeno, demokraten nebeno, fasistenek nebeno. Tugluk u kamo ke dermo inude niya feteline xo sas kerdo. Vatana mi oyo ke, ju saro ke raya xora vurriya ya beno “internasyonalist” ya beno “demokrat” yaki beno “biratist” labele XO nebeno. Sekeno bikero XO nebeno. Hata ke XO asimile nebi, kes besenikeno ke uzwe na welate bimbarek bivejiyo.

  2. ‘Ju şar o ke raya xo ra vurîya, ya beno ‘enternasyonalist’ ya beno ‘demokrat’ ya beno ‘biraist’ labelê nêbeno ‘xo’. Mêymanê Wisarî.
    Hay ti weş be Meymanê Wisarî…La Pêro Aysel Xanimî feqîr ê,nînan danê qesî kerdene. Plan, zaf xorî yo.her çî, zelal o. her çî, çiman ver der o. No çik o ke? Hîna ma çi ‘çerçîyan vînenîme’.

Comments are closed.