Hewayo qilêrin, qefelîyayîş, stres, werdişo neweş ûsn. faktor ê ke cîldê însanî kenê neweş û xirabin. Qilêr û makyajê ke serê cîldê rî de yeno pakerdene, gerek ke bê zerardayîş cîld ro û tebîî bêrê pak kerdene. Seba naye pîyase de xeylê produktê kosmetîkî estê ke zafane baha yê. Labelê malzemeyê naye kî her çê (keye) de estê û zaf basît virazînê. Wa sirf cinîkî ney, gerek ke merdimî (mordemî) kî hewte de reyê cîldê rîyê xo pak bikerê. Seba naye pirakerdişê maskeyê kosmetîkî usûlêde rind o.
Gama juyine (yewine): Banyoyê buxarî
Seba amadekarîya pakkerdişê cîldî her çî ra ver cîld ver buxar yeno şanayene. No semed ra di lîtreyî awe ju (yew) quşxane de girênînê û sere (sare) yeno tede. Dormeyê sereyî de ju (yew) xewlîye yeno şarnayene ke buxar teber meşêro. Nîya 5-10 daqayî vêrenê ra. Dima ereq û awe bi xewlîye ra yenê pak kerdene.
Gama dîyine: Viraştişê maskeyî tarîfan ra gore
Seba Cîldo Huşk: Maskeyê Avokadoyan
Ju (yew) avokado yeno pelixnayene û tey koçika qijkek a hemgênî û ju (yew) koçika qijkek a sîrkeyê saye yeno kerdene. Na bi (ebe) zerdikê hakî têwerte bena û ser o kî koçika girs a rûnê zeytunan yeno, dima gerek ke rind tadîyo. Naye ra maske yeno viraştene. Maske yeno rî ser û nêm saete ra tepîya însan şîkîno rîyê xo pak bişuyo.
Seba Cîldo Normal û Huşkî: Maskeyê Awa Gulan
0,1 lître awa gule serê adirî de giran-giran yena girênayene. 25 gramî tozê şitî û ju (yew) koçika girs a hemgênî ra pîya gerek ke însanî naye hurê fîyo. Naye ra tepîya 30 gramî rûnê vame yeno zere. Eke qedîya, ju (yew) qab de tenê serdin bibo û dima rî ser o jê (sey) maske pabeno. Nêm saete ra tepîya xewlî, pêşgîre ya kî peme ra rî yeno pak kerdene.
Seba Cîldo Rûnin: Maskeyê Vame:
120 gramî vame, sipîyê ju (yew) hakî, 1-2 koçika girs a awa gulan lazim l. Raver ra vameyî pelixînê toz benê, sipîyê hakî kî tey beno. Heta ke nê malzemeyî benê jê (sey) macun, awa gulan yena zere. No maske rî ra beno, des daqayan ra tepîya rî yeno pak kerdene.
Seba Cîldanê Bînan: Maskeyê Ardanê Lazutî
Ju (yew) koçika qijkek a ardabê lazutî, ju (yew) koçika qijkek a hemgênî benê têwerte ro, û rî ser o 20-25 daqayî yenê pakerdene. Badêna cîld awe ra yeno şutene. No maske ra noxteyê şîyayî kî benê vîndî.
Gama hîrêyine: Viraştişê tonîkî
Gerek ke maske ra tepîya kremê rî ke her roje cîld ser o beno, rî ra bibo. No maskeyê ke cor ra yenê nuştene, hewte de reyê yenê viraştene. Gerek ke cîld her peşewe bêro pak kerdene. Seba naye tarîfê taybetî estê:
Tonîkê şîlanan: Şîlane jê (sey) çay yeno dem kerdene û pê naye cîld pak beno. Nîya cîld hem beno pak hem kî çîp maneno.
Tonîk seba cîldanê rûninan: 1 koçika qijkek a sîrkeyê saye, 8 koçikê awa germike (awa mîneraline) benê têwerte û nîya seba cîldanê rûninan tonîkêde efektîf virazîno. Şutişê cîldî ra ver tonîk bi peme yeno pak kerdene. Şodirane û peşewe nîya cîld ke bêro pak kerdene, cênc maneno.
Awa mîneraline: Awa germike de xeylê mînarelê ke seba cîld rind ê, estê. Şutena ra ver bi ju (yew) peme ra awa mînareline ra rî şodirane ya kî peşewe bêro pak kerdene.
