Şarê Girê Sipî ke zordarîya terorîstanê DAÎŞ ra remabî Kurdîstanê Vakurî, nika hêdî-hêdî cêreno ra welatê xo. Melumatê YPG ra gore, şaristan de karê pakkerdişî qedîya.
Ewro şodir xeylê girêsipîyijî verê vîyarteyê sînorî yê Akçakale de vindetî ke racêrê welatê xo. Çi esto ke vîyarte hetê dewleta tirke ra cadaye mende. Wextê îşgalê DAÎŞ de sînor rakerde bîyo, la nika cadaye yo. Coka milet cayêde bîn de çeperan ser ra vêrd Kurdîstanê Rojawanî. Yeno vatene ke ewro tewr tay 500 kesî peyser şîyê bi Girê Sipî.
Nika bi seyan kesî sînor de vindenê ke ravêrê welatê xo. Texmîn beno ke hûmara înan nê rojanê ameyoxan de bena zêdîye.
