31 adare 1947 de serekkomarê Kurdîstanê Mehabadî Qazî Mihemed, serekwezîr Sey Hecî Baway û wezîrê pawitişî Uşenê Seyfîyê Xanî meydanê Çarçiraya Komara Kurdîstanî ya Mehabadîd de hetê dewleta Îranî ra ameye darde kerdene.
Qazî Mihemedî 22. çele 1946 de meydanê Çarçira de Komara Kurdîstanî îlan kerdîbî. 11. gucige 1946 de kî hukmatê Kurdîstanî ameybî ronayene. A roje bi qerarê parlamentoyê neteweyî yê Kurdîstanî Qazî Mihemed bîbî serekkomarê Kurdîstanî, Sey Hecî Baway serekwezîr û Uşenê Seyfîyê Xanî wezîrê pawitişî. Aye ra kî dot Mistefa Berzanî sey qumandarê pêroyî yê arteşe ameybî wezîfe kerdene. A roje parlamentoyê Kurdîstanî kurdkî sey ziwanê resmî nas kerd û marşê “Ey Reqîb” kî sey marşê neteweyî yê Kurdîstanî ame îlan kerdene. Tepîya wendegehî bi ziwanê kurdkî hetê dewleta Kurdîstanî ra amey ronayene, nê wendegehî de bi ziwanê kurdkî perwerdeyê mecburî ame dayene. 10 adare de Yewîya Sovyetan yew îstasyonê radyo rusna Mehabat û xeyrê nê îstasyonî ra radyoyê Mehabatî bi weşanê bi kurdkî dest kerd ci.
Badê ke artêşa sovyete erdê Kurdîstanî ra vejîya, 17 kanûne de artêşa Îranî kewt erdê Komara Mehabatî û 31 adare 1947 de serekkomarê Kurdîstanî (Mehabad) Qazî Mihemed, serekwezîr Sey Hecî Baway û wezîrê pawitişî Uşenê Seyfîyê Xanî meydanê Çarçira de hetê dewleta Îranî ra amey dare eştene.
Dardkerdişê xo ra ver Qazî Mihemed pêskirakê bi ayê çimanê ey ameyo pileşnayane, çir keno û nîya vano:
“Xayînênê, ez şarê xo rê se kerdo ke çimanê mi cadanê? Ez nê waxtê xoyo peyênî de wazena ke şarê xoyê hêcayî bi çimanê xo bivînîne. Nîya ez wazena ke bi zerrîweşîye û zerrîya xo verba tarîye ke nika yeno leşamî ser şêrîne. Ez tena lajê şarê xo ya û nîya kî manena. Şaro kurd weş bo, azadîya Kurdîstanî weş bo. Kes qet besenêkeno azadîye ma ra dûrî bikero. Şima nika heyatê Qazî Mihemetî cênê, labelê bizanê ke zerreyê kurdan de xeylê Qazî Mihemedî estê.”
No hewte xeylê cayanê Kurdîstanî de Qazî Mihemed û hevalê xo yenê yad kerdene.
