Kurdîstan û Tirkîya de duştê çapemenîye de operasyonê hemdemî amey viraştene. Hedefê operasyonan rojnameyê Özgür Gündem, Ajansa Xeberan a Dîcleyî (DÎHA), Etîk Ajans, Çapxaneyê Günî û Demokratik Modernite bîy. Heta nika 42 rojnameger û medyakarî binê nezaretî der ê.
Telîmatê operasyonî hetê Dozgerîya Komar a Îstanbulî ra ame dayene. Henî aseno ke hedefê tewqîfî karkerê medyaya kurde û medyakar bîyê ke ge-ge mesela kurdan de eleqedar bîy. Operasyonan vizêr şodir dest kerdî ci, bingeyê tewqîfî qanûnê antî-terorî yo. Roja 20. kanûne de Dîyarbekir, Wan, Adana, Mêrsîn, Îstanbul û Anqara de hemdem ofîs amey cêrayene. Naye de hem rojnamegerî amey tewqîf kerdene hem kî materyalê xeberan, huşkedîskî û arşîvî amey top kerdene. Çêberê (keyberê) ofîsan no taw hetê polîsî ra cadaye yê.
Polîs û dozgerîye ra gore têkilîya rojnamegeranê tewqîfkerdeyan bi dewaya KCK esta. Goreyê melumatê dewlete mabênê di serran de 500 gumandarê dewaya KCK amey pêgirewtene. Sîyasetkar û pisporan ra gore dewlete nîya ceribnena ke muxalefetê xo bêveng bikero.
Tewqîfkerdişê rojnamegeran hetê şar, çapemenîye, partîyanê sîyasî û sendîkavanan ra ame protesto kerdene. Xeylê şaristanan de protestoyî yenê viraştene, tey kî pankartî jê (sey) “Vizêr bomba, ewro nezaret, çapemenîya azade nêna bêveng kerdene” amey hewa nayene. Xebera ANF ra gore tewqîfkerdeyan ra 20 teneyî dest bi grevê vêşanîye kerd. Protestokerdoxanê şarî ra kî tayê grev cênê.
Komîsyonê Yewîya Ewropa (YE) sîyasetê Tirkîya rexne kerd. Komîserê YE yê Hîrakerdiş û Sîyasetê Cîranan Stefan Fuleyî ra gore YE serebûtanê Tirkîya ra bena “narehet. Azadîya çapemenîye şertanê endamîya YE ya tewr muhîman ra ju (yew) ya.” Goreyê melumatê Komela Heqanê Merdiman (ÎHD) Tirkîya de tewqîfkerdişo aktuel ra ver 71 rojnamegerî hepisxaneyan der ê. Rêxistina Rojnamegeranê Bêsîndorî ra gore kî Tirkîya azadîya çapemenîye de mabênê 178 welat û cayan de cayo 138. cêna.
