Parlamentoyê Fransa duştê pêro tehdîdê sîyasetê Tirkîya de vizêr qerar girewt ke jenosîdê armenîyan bêro qebul kerdene. Qanûn ke bi zafêrîya rayan vejîya, jenosîdê armenîyan yê serra 1915 jê (sey) sucê însanîyetî nas keno. Pêro partîyê ke parlamentoyê Fransa de temsîl benê, peyê qerarê qanûnî de vindetî.

Endama partîya muhafezekare UMP Valérîe Boyer na pêşnîyaza qanûnî ardîbî parlamento ver. Prosesê qerardayîşî de Tirkîya xeylê rey ceribna ke vernî ro vejîyayîşê qanûnî bicêro. No qerar ra înkarkerdişê jenosîdê armenîyan resmî yeno ceza kerdene. Cezaya înkarkerdişê jenosîdê armenîyan heta 45.000 Euroyî ya kî heta 1 serre hepisxane ya.

Raydayîşê parlamentoyî ra dime gerek qanûnî senato ra bivîyaro û uca (uza) ray bicêro. Seba ke partîyanê çepgiran senato de zafêrîye cênê, pisporê sîyasetî vanê ke qanûn zaf asan bi serkewtiş senato ra do bivîyaro. Wekîlê partîya sosyalîstan Françoîs Pupponî da zanayene ke êndî gerek mesela kurdan bêro ra zon (ziwan). “Gerek ma êndî Tirkîya de derheqê mesela kurdan de qisey bikerîme. Heta nika ma pê şarê armenîyan xapit, gerek no xapnayîş ra ravêrîme.”

Saeta ke qerarê qanûnî tesdîq bîyo, tayê hezarî tirkî cayanê cîya-cîyayan ê Fransa ra amey Parîs ke kombîyayîşê de no qerar protesto bikerê. Dewleta Tirkîya kî sersefîrê xo Parîs ra ant (ont).

Fransa jenosîdê armenîyan ke tede dorê 1,5 armenîyî amey qir kerdene, serra 2001 de qebul kerdîbî. Serekkomarê Fransa yê ê demî Françoîs Mîtterandî jê (sey) serekêde verên ê dewletê no jenosîd qebul kerdîbî. Welatê Swîsî de kî înkarkerdişê jenosîdê armenîyan ewro suc o. Fransa de dorê 500.000 armenîyî ciwîyênê.

(Resim: notfrancois)