Hêzê YPG Kurdîstanê Rojawanî de duştê çeteyanê terorîstanê “Dewleta Îslamî” (DÎ) de şonê raver. Melumatanê peyênan ra gore kantonanê Cizîre û Kobanê de raverşîyayîşî bi şidet dewam benê – hedef Girê Sipî yo. Eke planê YPG yeno ca û warê mabênê nê kantonan beno azad, hêzê YPG besekenê mabênê kantonan de yew korîdor rabikero.

Roja 27. gulane de YPG Mebrûka, nêzdîyê Serê Kaniyê de, kerdbî azad. Mebrûka verê cû merkezêde muhîm ê DÎ bîyo. Esnaya nê operasyonî de ke tede yew warê 1.000 metrekareyan azad bî, tey koyê Evdilezîzî kî ame pak kerdene û nika binê kontrolê YPG der o. Mebrûka Serê Kaniyê ra 37 km dûrî ya. Uca yew merkezê elektrîkî esto ke seba kantonê Kobanê muhîm o. Enerjî awbendê Reqqe ra yena. Bi azadkerdişê Mebrûka problemê cereyanî yê Kobanê û Cizîre nika hîna rehet hel benê. Operasyonê azadkerdişî de çar cengdarê YPG/YPJ canê xo dayî. Goreyê fermandara YPG Rubare Qamîşlo ra, operasyonê YPJ û YPJ ê azadkerdişê rojawanê kantonê Cizîre roja xo ya 24. de dewam keno. Nika kî başûrê rojawanê Serê Kaniyê de operasyonî estê. Abîşew hêzanê YPG hîrêna dewî, Hirubî, Acle û Recan, destê çeteyan ra xelisnayî ra. Hûmara merdeyanê DÎ hîna nêameye dayene. Ser o kî YPG xeylê çekî, mermî û roketî girewtî.

Kantonê Cizîre de pêrodayîşê azadkerdişî dewam benê
Kantonê Cizîre de pêrodayîşê azadkerdişî dewam benê

Kobanê kî roja xo ya 258. de xo ver ro dana. Vizêr rojhelatê kantonî de dewê Cirîn û Şewitî destê çeteyan ra ameyî raxelisnayene. Pêrodayîşî hîna dewam kenê. 24 saetanê peyênan de di cengdarê YPG bîyê şehîd. Boyna, yew vilaweka muştereke de, YPG û hêzanê Burkan el-Firatî da zanayene ke înan pîya dest bi operasyonê azadkerdişê Girê Sipî kerd. Burkan el-Firat yew hêzo muşterek e YPG û hêzanê cayîyan a Artêşa Xoser a Sûrîye yo. Na grûba eskerîye 10. êlule 2014 Kobanê de saz bîye.

Vilaweke de ame vatene ke çeteyan zafê reyan însananê sîvîlan xebitnenê, coka venga şarê Girê Sipî dîya ke cayê xo terk bikero ke nêkewo destê DÎ. Spîkerê Burkan el-Firatî Şerwan Derwîşî va, “Ma sey Burkan el-Firat venga miletê xo danîme ke seba weşîya xo cayanê şerî ra, rojawanê Girê Sipî de, uca ra dûrî vindê. Wa şarê Şîrîn û Cerablusî baldar bibê ke çeteyê terorî yê DÎ înan sey sitare nêxebitnê. Çeteyî wazenê ke şarê ma warê cengî de bo. Firsend mede înan! Seba ke sîvîlî bêrê seveknayene, lazim o ke şarê ma ê cayî seba wextêde kilm biterikno, bitaybetî êyê ke cayanê pêrodayîşî de ciwîyenê.”

Girê Sipî werteyê kantonanê Kobanê û Cizîre der o. Bi azadkerdişê Girê Sipî, mumkîn o ke kantonê Cizîre û Kobanê mîyan de yew korîdor rabo û nîya nê kantonî pêresê.

2 ŞÎROVEYÎ

  1. Vizêrî vatêne hetanî Girê Spî 7 km mendê. Nika zî erebê el-Nusra perrenê YPG ser! Şima dî, ganî ma ê korîdorî bivirazê, çunke dişmenê ma zaf ê!

Comments are closed.